शेठ ज. नौ. पालीवाला महाविद्यालयात ‘फुलोरा-२०२६’
पाली, ता. २५ (वार्ताहर) : पाली येथील शेठ ज. नौ. पालीवाला महाविद्यालयात ‘फुलोरा-२०२६’ या वार्षिक स्नेहसंमेलनाचे क्रीडा व सांस्कृतिक कार्यक्रम उत्साहात पार पडले. यानिमित्त आयोजित पारितोषिक वितरण सोहळ्यास मुंबई विद्यापीठाच्या लोककला अकादमीचे संचालक व प्रसिद्ध लोककलावंत डॉ. गणेश चंदनशिवे प्रमुख पाहुणे म्हणून उपस्थित होते.
डॉ. चंदनशिवे यांनी गोंधळ, भारूड व पोवाड्यांचे सादरीकरण करत विद्यार्थ्यांमधील सुप्त कलागुण विकसित करण्याबाबत प्रेरणादायी मार्गदर्शन केले. ‘बाजीराव मस्तानी’ चित्रपटातील पार्श्वगायनाचे अनुभव सांगत त्यांनी सृजनशीलतेचे महत्त्व अधोरेखित केले.
या वेळी शैक्षणिक, क्रीडा व सांस्कृतिक क्षेत्रात उल्लेखनीय कामगिरी करणाऱ्या विद्यार्थ्यांचा तसेच आदर्श शिक्षक व नेट-सेट उत्तीर्ण प्राध्यापकांचा गौरव करण्यात आला. कार्यक्रमाला संस्थेचे पदाधिकारी, प्राचार्य, प्राध्यापक, कर्मचारी व विद्यार्थी मोठ्या संख्येने उपस्थित होते.