रवींद्रनाथ ओव्हाळ यांना ‘निर्भीड पत्रकार सन्मान’ जाहीर
पाली (वार्ताहर) : रायगड प्रेस क्लबतर्फे दिला जाणारा सन २०२६ चा ‘प्रकाश काटदरे स्मृती निर्भीड पत्रकार सन्मान’ ज्येष्ठ पत्रकार रवींद्रनाथ ओव्हाळ यांना जाहीर झाला आहे. ८ एप्रिल रोजी पनवेल येथे होणाऱ्या सोहळ्यात त्यांना हा पुरस्कार प्रदान करण्यात येणार आहे. गेल्या तीन दशकांपासून पत्रकारिता व सामाजिक क्षेत्रात कार्यरत असलेल्या ओव्हाळ यांनी आपल्या लेखणीद्वारे जनसामान्यांचे प्रश्न प्रभावीपणे मांडले आहेत. त्यांच्या निर्भीड व समाजाभिमुख कार्याची दखल घेत हा सन्मान जाहीर करण्यात आला. यापूर्वीही त्यांना विविध पुरस्कारांनी गौरविण्यात आले आहे. त्यांच्या निवडीबद्दल रायगडसह पाली-सुधागड परिसरातून अभिनंदनाचा वर्षाव होत आहे.