महाड, ता. १७ (बातमीदार) : रायगड जिल्ह्यातील सात विधानसभा मतदारसंघांमध्ये २० नोव्हेंबरला निवडणुका होत असून यासाठी आवश्यक असणारे मनुष्यबळ प्रशासनाकडून तैनात करण्यात आले आहे. निवडणुकीसाठी तब्बल १५ हजार १६९ कर्मचारी नेमण्यात आले आहेत. यामुळे निवडणूक प्रक्रिया सहज व सुलभ होण्यास मदत होणार आहे.
निवडणूक प्रक्रियेमध्ये काम करणाऱ्या सर्व कर्मचाऱ्यांकरिता विविध स्तरावरील प्रशिक्षण पूर्ण करण्यात आले आहे. सात मतदान केंद्रांमधील ८५ वर्षांवरील मतदार तसेच दिव्यांग मतदार यांचे गृहमतदानाचा कार्यक्रमदेखील पार पडला आहे. आता प्रत्यक्ष निवडणुकीकरिता कर्मचारी सज्ज झाले आहेत. जिल्ह्यामध्ये एकूण २,७९० मतदान केंद्र असून ३० सहाय्यक मतदान केंद्र अशी एकूण २,८२० मतदान केंद्र आहेत. प्रत्येक मतदान केंद्रावर काम करण्यासाठी मतदान केंद्राध्यक्ष, प्रथम मतदान अधिकारी व इतर मतदान अधिकारी यांची नियुक्ती केली जाते. जिल्ह्यामध्ये सात मतदान केंद्रांवर ३,४१९ मतदान केंद्राध्यक्ष आवश्यक असून ३,४७५ कर्मचारी उपलब्ध करण्यात आले आहेत. तर, प्रथम मतदान अधिकारी म्हणून ३,४२६ कर्मचारी आवश्यक असून ३,५३४ कर्मचारी उपलब्ध करून देण्यात आले आहेत. इतर मतदान अधिकाऱ्यांमध्ये ७,३७१ कर्मचाऱ्यांची आवश्यकता असून ८,१६० कर्मचारी उपलब्ध करण्यात आले आहेत. अशा प्रकारे जिल्ह्यातील सर्व मतदान केंद्रांवर काम करण्यासाठी १४,२१६ कर्मचाऱ्यांची आवश्यकता असून १५,१६९ कर्मचारी उपलब्ध करण्यात आले आहेत. त्यामुळे कर्मचाऱ्यांची कोणतीही कमतरता मतदानाच्या दिवशी राहणार नाही, याची दक्षता घेण्यात आली आहे. याशिवाय आदर्श आचारसंहिता अंमलबजावणीसाठी पथकाची नियुक्ती केली आहे. या पथकामध्ये एक जिल्हा निवडणूक अधिकारी व त्यांच्यासोबत विधानसभा मतदारसंघनिहाय नोडल अधिकारी अशी नियुक्त करण्यात आली आहे.

मतदारसंघनिहाय कर्मचारी
पनवेल - ३,४८७
कर्जत - १,९६१
उरण - १,८९३
पेण - २,३६०
अलिबाग - १,९९२
श्रीवर्धन - १,७३४
महाड - १,७४२
........
एकूण - १५,१६९