महाड, ता. १९ (बातमीदार) : महाडमध्ये पावसाचा जोर वाढत असून गुरुवारी (ता. १९) सावित्री नदी इशारा पातळीजवळ आल्याने पुराच्या भीतीने महाडकर चिंतेत आहेत. महाडमध्ये २४ तासांत १२३ मीटर पावसाची नोंद झाली असून बिरवाडी, नाते, तुडील, रायगड व वाळण विभागातदेखील मोठ्या प्रमाणात पर्जन्यवृष्टी झाली आहे. बुधवारी रात्रीपासून सुरू झालेला मुसळधार पाऊस थांबण्याचे नाव घेत नसल्याने व्यापारी व नागरिक चिंतेत पडले आहेत.
महाड शहरातील दस्तुरी नाका परिसरामध्ये मोकळ्या शेतजमिनीत गुरुवारी गांधारी नदीचे पाणी शिरले होते. महामार्ग ते दस्तुरी नाका परिसरामध्ये रस्त्याच्या कडेला असलेले दोन्ही ओढे काही वर्षात पूर्णपणे बुजवल्‍याने या ठिकाणी मोठ्या प्रमाणात पाणी साचले होते. महाड- रायगड मार्गावर लाडवली येथेदेखील सखल भागात गांधारी नदीचे पाणी शिरले होते. महाड शहरामध्ये गटार स्वच्छतेची कामे योग्य प्रमाणात न झाल्याने शहरातील काही भागांत पावसाचे पाणी तुंबले होते. दस्तुरी नाका ते बुटाला सभागृहापर्यंत नवीन रस्त्याचे काम हाती घेण्यात आले असून भरावामुळे परिसरामध्ये मोठ्या प्रमाणात पाणी साचत आहे.
पाण्याचा निचरा होण्यासाठी महाड नगरपालिकेच्या सफाई कामगारांनी गुरुवारी नाल्यांची व गटारांची साफसफाई केली. पावसाचा जोर वाढल्याने जिल्हाधिकारी यांनी शाळांना सुट्टी जाहीर केली होती; परंतु सकाळच्या शाळेला गेलेल्या मुलांना सुट्टीचा संदेश उशिरा मिळाल्याने शाळा साडेनऊ वाजता सोडण्यात आली. त्यामुळे पालक वर्ग तसेच स्कूल बसचालकांची धावपळ उडाली. शहरामध्ये शिकण्यासाठी येणाऱ्या ग्रामीण भागातील विद्यार्थ्यांना पावसामुळे गैरसोयीचा सामना करावा लागला. पावसाचा वाढता जोर लक्षात घेता महाड शहरामध्ये नगरपालिका प्रशासन तर ग्रामीण भागामध्ये महसूल विभागाची आपत्कालीन यंत्रणा सज्ज होती. मुसळधार पावसामुळे महाड तालुक्यातील गांधारी, काळ व सावित्री या तिन्ही नद्या तुडुंब भरून वाहत आहेत.

रानबाजीरे धरणातून विसर्ग
तालुक्यात मोठ्या प्रमाणात पडणारा पाऊस व त्यातच रानबाजीरे धरणातून होणारा पाण्याचा विसर्ग, त्यामुळे सावित्री नदीच्या पाण्याच्या पातळीत वाढ होत होती. महाड नगरपालिकेकडून प्रत्येक तासाला सावित्री नदीतील पाण्याची पातळी कळविण्यात येत होती. दुपारपर्यंत पाण्याची पातळी इशारा पातळीच्या जवळ पोहोचण्याचा धोका निर्माण झाल्याने व्यापारी वर्ग व शहरातील नागरिक पुराच्या भीतीने चिंतेत पडले आहेत.

महाड