रायगडावर जाणारा पायरी मार्ग सुरू
रेड, ऑरेंज अलर्ट काळात बंदी
महाड, ता. १९ (बातमीदार) : खबरदारीचा उपाय म्हणून बंद करण्यात आलेला रायगड किल्ल्याचा पायरी मार्ग आता रेड व ऑरेंज अलर्ट वगळता सुरू राहणार आहे. जिल्हाधिकाऱ्यांनी याबाबतचा नवीन आदेश जारी केला असून, यामुळे शिवप्रेमी व व्यावसायिकांमध्ये आनंदाचे वातावरण आहे.
रायगड किल्ला व परिसरात पडत असलेला मुसळधार पाऊस आणि त्यामुळे कोसळणाऱ्या दरडींच्या पार्श्वभूमीवर या ठिकाणी येणाऱ्या पर्यटन व शिवप्रेमींची सुरक्षितता लक्षात घेता खबरदारीचा उपाय म्हणून रायगड जिल्हाधिकाऱ्यांनी १५ ऑगस्टपर्यंत रायगड किल्ल्याचा पायरी मार्ग बंद ठेवण्याचे आदेश दिले होते. या आदेशाचे उल्लंघन करणाऱ्यांवर कारवाई केली जाईल, असे स्पष्ट संकेतही त्यांनी आदेशात दिले होते. परंतु केवळ पाच दिवसांमध्ये या आदेशामध्ये बदल करण्यात आला आहे. रायगड किल्ल्याचा पायरी मार्ग खुला राहणार असून, रेड व ऑरेंज अलर्ट असणाऱ्या दिवशी हा मार्ग बंद ठेवला जाणार असल्याचे नवीन आदेशात जिल्हाधिकाऱ्यांनी म्हटले आहे.

अलर्टबाबत संभ्रम
पायरी मार्ग बंद ठेवण्याचे आदेश दिल्याने शिवप्रेमींची व स्थानिक व्यावसायिकांची मोठी गैरसोय निर्माण झाली होती. लहान-मोठ्या व्यावसायिकांवरदेखील याचा मोठा परिणाम होणार होता. या सर्व गोष्टींचा पुनर्विचार करून जिल्हाधिकाऱ्यांनी या आदेशात बदल केला आहे. रेड व ऑरेंज अलर्ट असेल त्या वेळी रायगडाकडे जाणारा चित्त दरवाजा व नाणे दरवाजा हे दोन्ही मार्ग बंद राहणार आहेत. जिल्हा प्रशासनाने या निर्णयात बदल केला असला तरी पर्यटकांना रेड व ऑरेंज अलर्टची माहिती कशी मिळणार तसेच या काळात गड बंद ठेवण्याची जबाबदारी निश्चितपणे कशी पार पडली जाणार, याबाबत प्रश्नचिन्ह निर्माण झालेले आहे.
...........