महाड, ता. १४ (बातमीदार)ः छत्रपती शिवाजी महाराजांनी निर्माण केलेल्या स्वराज्याची राजधानी असलेल्या रायगड किल्ल्यावर १५ ऑगस्टला देशातील दुसऱ्या क्रमाकांचा मोठा राष्ट्रध्वज फडकवला जातो. नगारखान्यासमोर असलेला हा ध्वजस्तंभ लालकिल्ल्याच्या ध्वजस्तंभानंतर मानाचा दुसरा ध्वजस्तंभ मानला जातो.
स्वराज्याची राजधानी असलेला रायगड देशाची अस्मिता आहे. दऱ्या-खोऱ्यातील मावळ्यांना एकत्र करत शिवरायांनी येथूनच पहिल्या स्वातंत्र्याची मुहूर्तमेढ रोवली. रायगडावर अनेक ऐतिहासिक वास्तू आहेत. या वास्तूंप्रमाणेच ध्वजस्तंभही लक्षवेधी आहे. त्यामुळे विशेष महत्त्वही आहे. दरवर्षीप्रमाणे यंदाही महाडचे नायब तहसीलदार यांच्या हस्ते शुक्रवारी (ता. १५) रायगडावर ध्वजारोहण होणार आहे.
---------------------------
देशातील दुसरा मानाचा ध्वज
देशात मानाचे मोठे ध्वज आहेत. त्यात ग्वालिअर किल्ला, कोल्हापूर, नालगोंडा, रायगड किल्ल्यावरील राष्ट्रध्वजाला मानाचे स्थान आहे. रायगडावरील ध्वजाचा आकार २१ फूट बाय १४ फूट असा आहे. सुमारे ५० फूट उंचीच्या स्तंभावर फडकणारा हा मोठा ध्वज पाहताना प्रत्येक भारतीयांचा ऊर अभिमानाने भरून येतो.
-----------------------------
शिवप्रेमींमध्ये विशेष उत्साह
रायगडावर ध्वजारोहण करण्यापूर्वी तयारीसाठी मोठी कसरत करावी लागते. एवढा मोठी ध्वज स्तंभावर चढविण्यासाठी १०-१२ जण लागतात. साखळीचा वापर करून ध्वज वर चढवावा लागतो. त्यानंतर दोरीच्या सहाय्याने फडकवला जातो. प्रचंड वारा, पाऊस असल्याने अतिशय काळजीपूर्वक ध्वजारोहण करावे लागते, परंतु मानाचा हा सोहळा साजरा करण्याची संधी मिळत असल्याने सरकारी अधिकारी, कर्मचारी तसेच शिवप्रेमींमध्ये विशेष उत्साह संचारलेला असतो.