शिक्षक अभियोग्यता, बुद्धिमत्ता चाचणी
अर्ज करण्यासाठी आठ फेब्रुवारीपर्यंत मुदत
मुंबई, ता. ३१ : संगणक प्रणालीवरून होणाऱ्या शिक्षक भरतीसाठी घेण्यात येणारी शिक्षक अभियोग्यता व बुद्धिमत्ता चाचणी परीक्षा २२ फेब्रुवारी ते ३ मार्च या कालावधीत ऑनलाईन पद्धतीने घेतली जाणार आहे. यासाठीचे वेळापत्रक महाराष्ट्र राज्य परीक्षा परिषदेने जाहीर केले आहे.
परीक्षेचे माध्यम, अभ्यासक्रम, पात्रता, अर्ज करण्याची पद्धत आणि कालावधी याबाबतची माहिती राज्य परीक्षा परिषदेच्या संकेतस्‍थळावर उपलब्ध आहे. ऑनलाईन अर्ज करताना उमेदवारांना कोणत्याही प्रमाणपत्राच्या मूळ प्रती जोडण्याची आवश्यकता नसून मूळ प्रमाणपत्राच्या पडताळणीस अधीन राहून उमेदवारांना परीक्षेस तात्पुरता प्रवेश दिला जाणार आहे,
या परीक्षेसाठी ऑनलाईन अर्ज करण्याची प्रक्रिया ३१ जानेवारीपासून सुरू झाली आहे. त्यासाठी इच्छुक उमेदवारांनी http://ibpsonline.ibps.in/mscepjan23/ या वेबलिंक वरून ऑनलाईन अर्ज करण्याचे आवाहन परीक्षा परिषदेकडून करण्यात आले आहे.
अर्ज करण्यासाठी ८ फेब्रुवारीपर्यंत मुदत देण्यात आली आहे; तर १५ फेब्रुवारीपासून उमेदवारांना ऑनलाईन प्रवेशपत्र उपलब्ध करून दिले जाणार आहे, अशी माहिती परीक्षा परिषदेचे उपायुक्त संजयकुमार राठोड यांनी दिली.