सकाळ वृत्तसेवा
मुंबई, ता. १ : मुंबईतील प्रदूषण चिंताजनक स्थितीजवळ येऊन पोहोचले आहे. लोकांच्या आरोग्यावर याचा परिणाम होत आहे. पालिकेने यावर तातडीने उपाययोजना करणे गरजेचे असून मुंबईत वैद्यकीय आणीबाणी जाहीर करा, अशी मागणी पालिकेचे माजी विरोधी पक्षनेता रवी राजा यांनी केली आहे.

रवी राजा यांनी वाढत्या प्रदूषणासाठी पालिका प्रशासनाला जबाबदार धरले आहे. याबाबत बोलताना त्यांनी सांगितले, की मुंबई जगातील सातव्या क्रमांकाचे प्रदूषित शहर ठरले आहे. यातून पालिका प्रशासकाची कामगिरी कशी आहे ते दिसत आहे. प्रशासनाने एकप्रकारे मुंबईला आपत्कालीन स्थितीत जाण्यास भाग पाडले आहे, असे रवी राजा यांनी म्हटले आहे.

लोकांना कामाशिवाय बाहेर पडू नये असे आवाहन केले जात आहे. लोकांनी मास्क घालावेत आणि घरी एअर प्युरिफायर चालवावेत, असा सल्ला देण्यात आला आहे. वाढत्या प्रदूषणामुळे लोकांना दोनतीन आठवड्यांहून अधिक काळ खोकला येत आहे. असे असतानाही पालिका प्रशासन कोणतीही कारवाई करण्याच्या मनस्थितीत नाही. ऑक्टोबरच्या मध्यापासून आम्ही याबाबत संवेदनशील आहोत. पालिकेला वारंवार कारवाई करण्यास सांगत आहोत. प्रशासन प्रदूषणापेक्षा फेरमूल्यांकनाच्या नावाखाली निविदांचे दर वाढवण्यात व्यस्त असल्याचे दिसून येत आहे. पालिका एअर प्युरिफायर बसवण्याबद्दल बोलले, पण त्याचे पुढे काहीही झाले नाही. पालिका हे वैद्यकीय आणीबाणी म्हणून का घोषित करू शकत नाही, असा सवाल उपस्थित करत त्यांनी राज्याच्या मुख्यमंत्र्यांना याकडे लक्ष देण्याची विनंती केली आहे.
.........