सकाळ वृत्तसेवा
मुंबई, ता. २४ : देशासह राज्यात पसरत चाललेल्या जेएन.१ या नव्या व्हेरिएंटची दहशत वाढत आहे. रविवारी राज्यात जेएन.१च्या नऊ रुग्णांची नोंद झाल्याने आता राज्यात जेएन.१ व्हेरिएंट रुग्णांची संख्या १० झाली आहे. ठाणे, पुणे आणि अकोला या ठिकाणी या रुग्णांची नोंद झाली आहे.
नऊ रुग्णांत पुण्यातील एका रुग्णाचा समावेश असून तो अमेरिकेतून आला असल्याची नोंद आहे. तसेच यापूर्वी सिंधुदुर्ग जिल्ह्यात रुग्ण आढळला होता. रुग्णांची लक्षण सौम्य असून ते उपचारातून बरे होत असल्याचे सांगण्यात येत आहे.
दरम्यान, रविवारी ठाणे पालिका क्षेत्रात ५ रुग्ण, तर पुणे पालिका क्षेत्रात २, तर पुणे ग्रामीण क्षेत्रात १ आणि अकोला पालिका क्षेत्रात १ अशा नऊ रुग्णांची नोंद करण्यात आली. यापैकी ८ पुरुष तर १ महिला आहे. यातील १ रुग्ण ९ वर्षांचा मुलगा असून १ जण २१ वर्षांची तरुणी आहे. तर १ जण २८ वर्षांचा तरुण असून उर्वरित ६ जण ४० वर्षांवरील नागरिक असल्याचे सांगण्यात आले. यातील ८ जणांनी कोविड लस घेतली आहे. हे सर्व घरात क्वारंटाईन राहत असल्याचे सांगण्यात आले. सर्वांना सौम्य लक्षणे आहेत.