सकाळ वृत्तसेवा
मुंबई, ता. १८ : अग्निशमन दल अधिक सक्षम करण्यासाठी अत्याधुनिक ड्रोनचा समावेश करण्याची गरज आहे; मात्र अधिकाऱ्यांच्या उदासीनतेमुळे ड्रोनचे आगमन लांबणीवर पडण्याची चिन्हे असून, मुंबईसारख्या दाटीवाटीच्या शहरात अग्निशमन दलाच्या जवानांना कसरत करावी लागत आहे.
उंचीवरील आग विझवण्यास सक्षम फायर ड्रोन ताफ्यात घेण्याचा विचार मुंबई अग्निशमन दल करीत आहे. दोन वर्षांपूर्वी ड्रोनचे पहिले प्रात्यक्षिक भायखळा येथील अग्निशमन दलाच्या मुख्यालयात घेण्यात आले. त्यानंतर १०० किलो वजन घेऊन ५० मीटर म्हणजे साधारणतः १८ मजल्यापर्यंत उडू शकतात, अशा प्रकारचे ड्रोन अग्निशमन दलात समाविष्ट करण्यात आले. अग्निशमन अधिकाऱ्यांनी शहराच्या आवश्यकतेनुसार काही बदल ड्रोनमध्ये सुचवले होते. त्यानंतर इतर कंपन्यांच्या ड्रोनची प्रात्यक्षिके महिनाभरापूर्वी घेण्यात आली. मुंबई अग्निशमन दलातील तांत्रिक तज्ज्ञांनी पालघर येथे ड्रोनची प्रात्यक्षिके पाहिल्यानंतर काही बदल सुचवण्यात आले; मात्र त्यासाठीचा खर्च कोटींच्या घरात गेल्याने प्रस्तावाला मंजुरी मिळत नसल्याचे एका वरिष्ठ अधिकाऱ्याने सांगितले.
---------------------------------------
अत्याधुनिक फायर रोबोटचा समावेश
मुंबईतील अनेक इमारती १०० वर्षांहून जुन्या आहेत. अनेक ठिकाणी ज्वलनशील पदार्थ, गॅस इत्यादींचा धोका आहे. अशा ठिकाणी अग्निशमन दलाच्या जवानांच्या जीवाला धोका असतो. अशा परिस्थितीला तोंड देण्यासाठी मुंबई अग्निशमन दलाने अत्याधुनिक फायर रोबोट्सचा समावेश केला आहे. वर्षभरात आणखी पाच रोबोट घेण्याचा प्रयत्न सुरू आहे.