लग्नाच्या भुलथापा
देऊन फसवणूक
डॉक्टरविरोधात गुन्हा दाखल
सकाळ वृत्तसेवा
मुंबई, ता. १० : एका रुग्णालयात लॅब टेक्निशियन असलेल्या २९ वर्षीय तरुणीला लग्नाच्या भुलथापा देऊन आर्थिक फसवणूक करणाऱ्या डॉक्टरविरोधात भोईवाडा पोलिस ठाण्यात सोमवारी गुन्हा दाखल करण्यात आला.

२०२१ मध्ये रुग्णालयात या तरुणीची २८ वर्षीय डॉक्टरशी ओळख झाली होती. ओळखीचे रुपांतर प्रेमात झाले आणि दोघांनी लग्न करण्याचा निर्णय घेतला. त्यानंतर कुटुंबीयांच्या संमतीने गेल्या वर्षी एप्रिलमध्ये दोघांचा साखरपुडा पार पडला. त्यानंतर दोन महिन्यांतच आरोपीने लग्न करण्यास नकार देत तिच्याशी संबंध तोडले. तरुणीने त्याला समजावण्याचा प्रयत्न केला असता त्याने शिवीगाळ केल्याचे तक्रारीत म्हटले आहे.

आरोपी डॉक्टरला शासकीय सोडतीत वांगणी येथे घर लागले होते. भविष्याची तरतूद म्हणून त्या घराची रक्कम दोघांनी मिळून भरायची असे ठरले. त्यानुसार तक्रारदार तरुणीने आरोपीच्या खात्यावर टप्प्याटप्प्याने पावणे दोन लाख रुपये भरले. तसेच त्याला ७० हजार रुपये मूल्य असलेला आयफोन घेऊन दिला होता. त्यामुळे केवळ आर्थिक फायद्यासाठी त्याने लग्नाच्या दिल्याचा भुलथापा दिल्याचा आरोपही तरुणीने तक्रारीत केला आहे, असे पोलिसांनी सांगितले.