होळी, रंगपंचमीला
मद्यपींची नाकाबंदी

गर्दीच्या ठिकाणांवर कडेकोट बंदोबस्त

मुंबई, ता. १२ : होळी, रंगपंचमीनिमित्त रस्त्यावरील मद्यपींचा अतिरेक रोखण्यासाठी मुंबई पोलिस शहरात सर्वत्र नाकाबंदी लावून ड्रंक ॲन्ड ड्राइव्हविरोधात विशेष मोहीम हाती घेणार आहेत. याशिवाय गल्लीबोळात कडेकोट बंदोबस्त ठेवण्यात येणार आहे. गर्दीची ठिकाणे, दाट आणि मिश्र वस्त्यांवर विशेष लक्ष असेल, असे पोलिस आयुक्तांनी स्पष्ट केले.

होळी, रंगपंचमी आणि दारू हे समीकरण बनले आहे. त्या पार्श्वभूमीवर अपघात होऊ नयेत, रस्त्यावरून मार्गक्रमण करणाऱ्या पादचारी, वाहनांना त्रास होऊ नये, महिलाविरोधी गुन्हे घडू नयेत, धर्म किंवा समाजभावना दुखावून कायदा व सुव्यवस्थेचा प्रश्न निर्माण होऊ नये या दृष्टिकोनातून बंदोबस्त आणि प्रतिबंधात्मक कारवाईचे नियोजन केल्याचे आयुक्तालयाकडून सांगण्यात आले.
---
असा असेल बंदोबस्त
मुंबई पोलिस दलातील सात अतिरिक्त आयुक्त, १९ उपायुक्त, ५१ सहाय्यक आयुक्तांसह १,७६७ पोलिस अधिकारी आणि ९,१४५ पोलिस अंमलदार शहरात तैनात करण्यात येणार आहेत. बाजारपेठा, रेल्वे स्थानके, राजकीय आणि सामाजिकदृष्ट्या संवेदनशील भागांत विशेष बंदोबस्त ठेवण्यात येणार आहे. त्या ठिकाणी पोलिसांसह राज्य राखीव पोलिस बल, दंगल नियंत्रण पथके, शीघ्र कृती दल, बॉम्बशोधक व नाशक पथक, गृहरक्षक दलाचा चोख बंदोबस्त ठेवला जाईल, असे आयुक्तालयाने स्पष्ट केले.
----
नाकाबंदी, कोम्बिंग आजपासून
गुरुवारी, शुक्रवारी पोलिसांकडून ठिकठिकाणी नाकाबंदीचे आयोजन करून तळीराम चालक, वाहतुकीचे नियम मोडणाऱ्यांवर कारवाई केली जाईल, असे सांगण्यात आले. नियमभंग करणाऱ्या आस्थापना व अभिलेखावरील गुन्हेगारांची झाडाझडतीही घेतली जाणार आहे.