एसटी महामंडळाच्या
अध्यक्षपदी प्रताप सरनाईक
सकाळ वृत्तसेवा
मुंबई, ता. ९ : एसटी महामंडळाच्या अध्यक्षपदी परिवहन मंत्री प्रताप सरनाईक यांची नियुक्ती करण्यात आली आहे. याबाबतची अधिसूचना बुधवारी परिवहन विभागाने काढली आहे. मुख्यमंत्री देवेंद्र फडणवीस यांनी दोन महिन्यांपूर्वी महामंडळाच्या अध्यक्षपदी अतिरिक्त मुख्य सचिव संजय सेठी यांची नियुक्ती केली होती.
राज्याच्या परिवहन खात्याची ज्या मंत्र्यांवर जबाबदारी असते त्यांच्याकडेच एसटी महामंडळाचे अध्यक्षपद देण्याची परंपरा आहे. दिवाकर रावते परिवहन मंत्री असताना २०१४ ते २०१९ या कालावधीत एसटी महामंडळाचे अध्यक्षपद त्यांच्याकडेच होते. महाविकास आघाडी सरकारच्या काळात २०१९ ते २०२२ या काळात अनिल परब यांच्यावर परिवहन खात्यासह एसटीच्या अध्यक्षपदाची जबाबदारी देण्यात आली होती. एकनाथ शिंदे मुख्यमंत्री असताना परिवहन आणि एसटी महामंडळाची जबाबदारी त्यांनी स्वतःकडेच ठेवली होती. ही परंपरा फडणवीस यांनी मोडली होती.