बोरिवलीत ‘पीपीपी’वर आधारित क्‍लिनिक
डायग्नोस्टिक, डायलिसिस केंद्रे; एकाच छताखाली लहान-मोठ्या तपासण्या
भाग्यश्री भुवड ः सकाळ वृत्तसेवा,
मुंबई, ता. १४ : भगवती रुग्णालयानंतर आता पालिकेने सार्वजनिक-खासगी भागीदारी (पीपीपी)वर आधारित स्वतःच्या जागेवर क्लिनिक, निदान आणि डायलिसिस केंद्रे चालवण्याचा निर्णय घेतला आहे. या केंद्रात लहान-मोठ्या चाचण्या एकाच छताखाली केल्या जातील.
क्लिनिकमध्ये सामान्य सल्लामसलतीचे शुल्क १० रुपये निश्चित करण्यात आले आहे. परंतु, विशेष डॉक्टरांच्या सल्लामसलतीचे शुल्क २९३ रुपये आणि सुपरस्पेशालिटीसाठी ३४५ रुपये निश्चित करण्यात आले आहे.
बोरिवली पश्चिमेत पंजाबी गली डायग्नोस्टिक सेंटर ही पालिकेची दोनमजली इमारत आहे. कोविड सुरू होण्यापूर्वी ही इमारत पूर्ण झाली होती, परंतु लॉकडाऊन सुरू झाल्यानंतर आणि रुग्णांची संख्या वाढल्यानंतर त्याचे कोविड सेंटरमध्ये रूपांतर करण्यात आले. त्या वेळी लक्षणे नसलेल्या पॉझिटिव्ह कोविड रुग्णांना तेथे क्वारंटाइन करण्यात आले होते. आता पालिकेने  ही इमारत ‘पीपीपी’वर देण्याचा निर्णय घेतला आहे.
पालिका आरोग्य विभागाशी संबंधित सूत्रांनी दिलेल्या माहितीनुसार, पालिकेने निविदाही जारी केली आहे. यामध्ये एक सुपरस्पेशालिटी क्लिनिक असेल. यामध्ये सामान्य एमबीबीएस डॉक्टर तसेच स्त्रीरोग, हृदयरोग, औषध, मूत्रविज्ञान आणि इतर सुपरस्पेशालिटी डॉक्टरांचा समावेश असू शकतो. क्लिनिकसोबतच एक डायग्नोस्टिक सेंटरदेखील असेल. त्‍यामध्ये एक्सरे, ईसीजी, सोनोग्राफी, सिटी स्कॅन, एमआरआय, मॅमोग्राफी अशा अनेक प्रकारच्या चाचण्या उपलब्ध असतील. या चाचण्या पालिका दराने केल्या जातील. याशिवाय शेकडो प्रकारच्या चाचण्यांसाठी दरदेखील निश्चित करण्यात आले आहेत. ३० वर्षांसाठी ‘पीपीपी’ तत्त्वावर देण्याची ही योजना आहे.
पालिकेच्या एका वरिष्ठ अधिकाऱ्याने नाव न छापण्याच्या अटीवर सांगितले, की ही इमारत रिकामी पडून असून ती क्‍लिनिकसाठी देण्यात येईल. यामध्ये क्लिनिकसह चाचणी सुविधादेखील पालिकेच्या दरात उपलब्ध असतील. सुपरस्पेशालिटीसाठी सध्या नागरिकांना केईएम, सायन, नायर रुग्णालयात जावे लागते. त्यांचा वेळ, पैसा वाया जातो. रांगांमध्ये उभे राहून त्‍यांना उपचार घ्‍यावे लागतात.
पालिकेच्या रुग्णांसोबत कोणताही भेदभाव होऊ नये, यासाठी एका विशेष कर्तव्य अधिकाऱ्याची नियुक्ती केली जाईल. ही चाचणी सुविधा फक्त मुंबईत राहणाऱ्या रेशन कार्डधारकांना आणि पालिका कर्मचाऱ्यांना परवडणाऱ्या दरात उपलब्ध करून दिली जाईल. सर्व राजकीय पक्षांनी आधीच ‘पीपीपी’ला विरोध केला आहे. अशा परिस्थितीत पालिकेला ‘पीपीपी’ तत्त्वावर आपले केंद्र देता येऊ शकते की नाही, हे येत्‍या काळात स्‍पष्‍ट होईल.

अशी असेल सुविधा
* सूत्रांकडून मिळालेल्या माहितीनुसार, तळमजल्यावर नोंदणी, सामान्य आणि विशेष ओपीडी, रेडिओलॉजी विभाग असेल. एक्सरे, सोनोग्राफी, सिटी स्कॅन आणि एमआरआयव्यतिरिक्त, ईसीजी, ईएमजी, पीएफटी इत्यादी इतर चाचण्या जेनेरिक फार्मसीसह केल्या जातील.
* पहिल्या मजल्यावर सुपरस्पेशालिटी, ऑक्युपेशनल आणि फिजिओथेरपी विभाग असतील. त्याशिवाय प्रगत पॅथॉलॉजी, मायक्रोबायोलॉजी, एंडोक्राइनोलॉजी लॅब असतील.
* दुसरा मजला डायलिसिस सेंटर, प्रगत दंत काळजी इत्यादींसाठी राखीव आहे.

सर्व सेवा नऊ महिन्यांत कराव्या लागणार सुरू
सूत्रांनी दिलेल्या माहितीनुसार ‘पीपीपी’वर हे केंद्र चालवणाऱ्या खासगी कंपनीला चार महिन्यांच्या आत ओपीडी सेवा, सहा महिन्यांच्या आत बेसिक पॅथॉलॉजी आणि रेडिओलॉजी, नऊ महिन्यांच्या आत सिटी स्कॅन आणि एमआरआय सेवा सुरू कराव्या लागतील.