ग्रामीण रुग्णालयांतही आता अवयव प्रत्यारोपण
अवयवदानाला प्रोत्साहन देण्यासाठी आरोग्य विभागाचा पुढाकार
सकाळ वृत्तसेवा
मुंबई, ता. १४ : राज्यात अवयवदानाला प्रोत्साहन देण्यासाठी राज्य सरकारने जिल्हा पातळीवर अवयवदान आणि प्रत्यारोपणाच्या सुविधा उपलब्ध करून देण्याची तयारी सुरू आहे. सरकारी वैद्यकीय महाविद्यालये आणि रुग्णालयानंतर आता जिल्हा आणि ग्रामीण रुग्णालयांमध्ये मेंदूमृत रुग्णांचे अवयव काढून त्याचा वापर प्रत्यारोपणासाठी करण्याची तयारी सुरू आहे.
राज्यात अवयव प्रत्यारोपणाच्या रुग्णांचा प्रतीक्षा कालावधी वाढत आहे. हे लक्षात घेऊन राज्यात अवयवदानाला प्रोत्साहन देण्यासाठी विविध उपाययोजना आखल्या जात आहेत. यासंदर्भात आरोग्यमंत्री प्रकाश आबिटकर यांनी आता प्रत्येक जिल्ह्यात अवयवदान आणि प्रत्यारोपणाच्या सुविधा उपलब्ध करून देण्याच्या दिशेने पावले उचलली आहेत.
सध्या जिल्हा आणि ग्रामीण रुग्णालयांत अवयवपुनर्प्राप्तीची सुविधा नाही. आता सर्व रुग्णालये अवयवपुनर्प्राप्ती केंद्रे म्हणून काम करण्यासाठी तयार केली जात आहे. अशा रुग्णालयांमध्ये मेंदूमृत रुग्णांचे मृतदेह सुरक्षित ठेवण्याव्यतिरिक्त, रुग्णाला मेंदूमृत घोषित करण्यासाठी चाचण्यांची सुविधा, रुग्णांच्या नातेवाइकांना अवयवदानासाठी प्रोत्साहन तसेच अवयव काढण्याची सुविधा असेल.
-----
अपघातांचे अधिक प्रकरणे
रस्ता अपघात किंवा इतर कोणताही अपघात असो, सर्व प्रकरणे सरकारी रुग्णालयात येतात. त्यामुळे अवयवदानाला प्रोत्साहन देण्यासाठी राज्य सरकारने या रुग्णालयांमध्ये अवयवदानाशी संबंधित सुविधा उपलब्ध करून देण्यावर भर दिला आहे, असे आरोग्य विभागाच्या एका वरिष्ठ अधिकाऱ्याने सांगितले.