जोगेश्वरीतून चार कोटींचे एमडी जप्त
दोन बड्या वितरकांना अटक
मुंबई, ता. १६ ः गुन्हे शाखेने एमडी या अमली पदार्थाच्या शहरातील बड्या वितरकांना बेड्या ठोकल्या. ही कारवाई गुरुवारी रात्री जोगेश्वरी परिसरात करण्यात आली. या कारवाईत गुन्हे शाखेने चार कोटींचे एमडी हस्तगत केले.
अब्दुल करीम नजीर शेख आणि यासीन अली शेख, अशी अटक आरोपींची नावे आहेत. हे दोघे मोठ्या प्रमाणावर एमडीचा साठा शहरात आणून त्याची घाऊक विक्री करत होते. त्यांच्या अटकेमुळे एमडी उत्पादक, वाहक आणि मुंबई महानगर प्रदेशातील किरकोळ विक्रेत्यांच्या साखळीबाबत महत्त्वपूर्ण माहिती गुन्हे शाखेच्या हाती लागू शकते, असे सांगण्यात आले आहे.
ही कारवाई गुन्हे शाखेचे निरीक्षक (कक्ष ५) घनश्याम नायर, सहाय्यक निरीक्षक चौधरी, उपनिरीक्षक अंकुश न्यायनिर्गुणे, बेंडाळे, हवालदार तानाजी पाटील आणि पथकाने पार पाडली. हे पथक गस्तीवर असताना अंबोली पोलिस ठाण्याच्या हद्दीत जोगेश्वरी बस डेपोसमोर अब्दुल करीम आणि यासीन पथकाला आढळले. दोघांना अमली पदार्थ तस्करीची पार्श्वभूमी असल्याने पथकाने त्यांना ताब्यात घेत झाडाझडती घेतली असता त्यांच्याकडे दोन किलो एमडी सापडले.