तिघांवर प्राणघातक हल्ला करणाऱ्यांना वाघबीळच्या जंगलातून अटक
कौशल्यपूर्ण तपासातून आरोपींचा ठावठिकाणा पोलिसांच्या हाती
मुंबई, ता. १९ ः परिसरात दहशत निर्माण करण्याच्या उद्देशाने तीन व्यक्तींवर प्राणघातक हल्ला करून पसार झालेल्या दोन सराईत गुन्हेगारांना विनोबा भावे नगर पोलिसांनी ठाण्याच्या वाघबीळ परिसरातील जंगलातून शिताफीने अटक केली. आरोपींनी मोबाईल वापर टाळल्याने तांत्रिक सहकार्य नसताना तपास कौशल्याच्या जोरावर पोलिसांनी ही कारवाई केली.
दत्ता पाटील उर्फ शेरु (३०), मनीष साहू उर्फ चिंटू(२४) अशी अटक आरोपींची नावे आहेत. १३ मे रोजी कुर्ला पश्चिमेकडील कोहिनूर सीटी, एचडीआयएल इमारतीत दत्ता, मनीष यांच्यासह महेश महाराणा उर्फ पांडा, प्रतीक सकपाळ आदींनी ऋतिक विश्वकर्मावर चॉपरने वार केले. त्याला वाचविण्यासाठी आलेले वृद्ध सासरे आणि अन्य नातेवाइकांवरही आरोपींनी वार करत गंभीर जखमी केले. हा प्रसंग घडत असताना परिसरातील रहिवासी गोळा झाले. आरोपींनी रहिवाशांना धारदार शस्त्रांचा धाक दाखवून धमकावले.
या गुन्ह्याची गंभीर दखल घेत पोलिस उपआयुक्त गणेश गावडे यांनी आरोपींना अटक करण्याच्या सूचना विनोबा भावे नगर पोलिसांना दिल्या. वरिष्ठ निरीक्षक रवींद्र क्षीरसागर, निरीक्षक शिवानंद देवकर आणि पथकाने महेश आणि प्रतिक या आरोपींना लागलीच बेड्या ठोकल्या, मात्र प्रमुख आरोपी दत्ता पसार झाला. मोबाईल वापरत नसल्याने त्याचा ठावठिकाणा शोधणे कठीण होते.
वरिष्ठ निरीक्षक क्षीरसागर, निरीक्षक देवकर आणि पथकाने आरोपी दत्ताचे निकटवर्तीय कोण, अशा परिस्थित तो कोणाची मदत घेऊ शकतो हे शोधण्यास आरंभ केला. त्यात त्यांना यश आले. एक साथीदार दत्ताच्या संपर्कात असल्याची माहिती पथकाला मिळाली. पथकाने त्याच्यावर पाळत ठेवली. तो दररोज वाघबीळच्या जंगलात तीन ते चार फेऱ्या मारू लागला. प्रत्येक फेरीत त्याच्या हाती जेवणाचा डबा, खाद्यपदार्थ, गरजेच्या वस्तू दिसू लागल्या. त्यावरून आरोपी दत्ता याच जंगलात दडून बसल्याची खात्री पथकाला झाली.
क्षीरसागर, देवकर यांच्या मार्गदर्शनाखाली सपोनि नेवसे, पोउपनि अमर चेडे, अंमलदार गांगुर्डे, गवारे, सांगळे, परदेशी, महाजन, पाटील, मालगुंडे, विशे, उगले आणि पथकाने रविवारी दुपारी वाघबीळच्या जंगलात सापळा रचला. त्यात दत्ता सहज पोलिसांच्या हाती लागला, मात्र त्याचा साथीदार मनीष पळून गेला. सुमारे १५ ते २० मिनिटांच्या पाठलागानंतर त्यालाही पथकाने अटक केली.