अधिक स्टीलनिर्मितीला मित्तलची स्वच्छ ऊर्जा
मुंबई ता २५ : आंध्र प्रदेशातील आर्सेलर मित्तलचा सर्वात मोठा अक्षय ऊर्जा प्रकल्प असलेल्या एक गिगावॉटचा सौर आणि पवन प्रकल्पातून अलीकडेच आर्सेलर मित्तलचा निप्पॉन स्टीलसोबतच्या संयुक्त उपक्रमाला स्वच्छ वीज पुरवण्यास सुरुवात केली आहे.
हा प्रकल्प ०.७ अब्ज डॉलर्सचा असून, तो आर्सेलर मित्तलची उपकंपनी असलेल्या एएम ग्रीन एनर्जीकडून उभारला गेला आहे. त्यामुळे त्यांच्या कार्बन उत्सर्जनात दरवर्षी १.५ दशलक्ष टनांची घट होण्याची अपेक्षा आहे.
या अक्षय्य ऊर्जा प्रकल्पाला हायब्रीड प्रकल्प म्हणून विकसित करण्यात आले आहे. त्यात १ गिगावॉट सौर आणि पवन ऊर्जा क्षमतेचे हायड्रो पंप्ड स्टोरेज सोल्यूशनसह एकत्रीकरण केले आहे. त्यामुळे प्रकल्प अखेर किमान २५० मेगावॉट २४ तास वीज पुरवेल. गुजरातमधील हजिरा येथील कंपनीच्या स्टील प्लांटमध्ये सध्याच्या ऊर्जेच्या गरजांपैकी २० टक्क्यांपेक्षा जास्त ऊर्जा ते पुरवेल, असे आर्सेलर मित्तलचे मुख्य कार्यकारी अधिकारी आदित्य मित्तल म्हणाले.