श्री लक्ष्मी नारायण मंदिराच्या जयंती महोत्सवाला अमित शाह यांची उपस्थिती

मुंबई, ता. २४ : माधवबाग संकुलातील श्री लक्ष्मी नारायण मंदिराला १५० वर्षं पूर्ण झाल्यानिमित्त आयोजित जयंती उत्सव कार्यक्रमास केंद्रीय गृह आणि सहकार मंत्री अमित शाह यांची प्रमुख उपस्थिती राहील. जयंती उत्सवाचे आयोजन २७ मे रोजी करण्यात आले आहे. मुख्यमंत्री देवेंद्र फडणवीस तसेच विधानसभा अध्यक्ष राहुल नार्वेकर, कॅबिनेट मंत्री मंगलप्रभात लोढा हेदेखील उपस्थित राहतील. मंदिराच्या शतकोत्तर परंपरेचा गौरव करणारा विशेष सांस्कृतिक कार्यक्रमदेखील या वेळी आयोजित करण्यात आला आहे. सांस्कृतिक कार्यक्रम सादरीकरणासाठी संगीत नाटक अकादमीच्या अध्यक्षा संध्या पुरेचा, सरफोजीराजे भोसले संस्था यांना आमंत्रित करण्यात आले आहे. श्री लक्ष्मी नारायण मंदिर हे मुंबईच्या सामाजिक व आध्यात्मिक वारशाचे प्रतीक आहे. माधवबाग संकुलाचा इतिहास तब्बल १५० वर्षांपूर्वीचा असून, जेव्हा हा परिसर ‘लालबाग’ म्हणून ओळखला जात असे तेव्हा इ. स. १८७४ मध्ये कपोल समाजातील दोन मान्यवर उद्योजक वर्जिवंदास माधवदास आणि नरोत्तम माधवदास यांनी आपल्या वडिलांच्या स्मरणार्थ १८७५मध्ये श्री लक्ष्मी नारायण मंदिराची स्थापना केली. या मंदिराचे बांधकाम प्रसिद्ध वास्तुविशारद श्री भीमा रामजी यांच्या देखरेखीखाली पोरबंदरच्या दगडांत करण्यात आले. पारंपरिक स्थापत्यशैलीचा उत्कृष्ट नमुना असलेले हे मंदिर आजही मुंबईतील एक प्रमुख श्रद्धास्थान म्हणून ओळखले जाते.