पदवीच्या दुसऱ्या गुणवत्ता यादीत कटऑफमध्ये किंचित घट
एआय, डेटा सायन्ससह वाणिज्य शाखेकडे कल कायम
मुंबई, ता. ३१ : मुंबई विद्यापीठाच्या अंतर्गत येणाऱ्या ९०४ वरिष्ठ महाविद्यालयातील कला, वाणिज्य, विज्ञानसह इतर विविध प्रकारच्या पदवी प्रवेशाची दुसरी गुणवत्ता यादी शनिवारी (ता. ३१) जाहीर झाली. यात मुंबई, ठाणे‍ जिल्ह्यातील वरिष्ठ महाविद्यालयांमध्ये कृत्रिम बुद्धिमत्ता (एआय)सोबतच डेटा सायन्स आदी नवीन अभ्यासक्रमांची कट ऑफ पहिल्या गुणवत्ता यादीच्या तुलनेत दोन ते चार टक्क्यांनी घट झाली आहे. दुसरीकडे वाणिज्य शाखेच्या प्रवेशासाठीचा कल या गुणवत्ता यादीतही कायम आहे.

पहिल्या गुणवत्ता यादीत रुईया महाविद्यालयात बायोटेकची कटऑफ ९४ टक्क्यावर जाऊन पोहोचली होती, ती या वेळी ८८.६ टक्के झाली तर पोद्दार महाविद्यालयात बीएफएमची कटऑफ ९४.५० टक्केवरून ९३.२ टक्क्यांवर आली. सेंट झेवियर्समध्ये कला, बीए सायकॉलॉजी अँड इंग्लिश शाखेची कटऑफ एक ते दीड टक्यांनी कमी झाली असून डेटा सायन्स आणि एआयकडे या वेळी विद्यार्थ्यांचा कल अधिक राहिल्याचे दिसून आले आहे. या यादीत प्रवेश मिळालेल्या विद्यार्थ्यांना २ ते ४ जून या कालावधीत संबंधित महाविद्यालयांमध्ये जाऊन कागदपत्रांची पडताळणी आणि शुल्क भरून प्रवेश पूर्ण करणे आवश्यक आहे. त्यानंतर पदवीच्या रिक्त राहिलेल्या जागांवरील प्रवेशाची तिसरी गुणवत्ता यादी ५ जून रोजी सायंकाळी सात वाजता जाहीर होणार आहे.