तरुणांना जडली पाठदुखी
सकाळ वृत्तसेवा
मुंबई, ता. ८ : पूर्वी पाठीचा त्रास हा वयस्कर लोकांमध्ये अधिक प्रमाणात आढळत असे; मात्र सध्या १८ ते ३० वयोगटांतील तरुणांमध्येही पाठदुखीचे प्रमाण झपाट्याने वाढत आहे. चुकीची बसण्याची सवय, सतत एकाच स्थितीत काम, व्यायामाचा अभाव आणि वाढते तणाव यामुळे मणक्यांची झीज लवकर सुरू होत आहे. वेळीच उपचार न घेतल्यास ही वेदना गंभीर स्वरूप घेते आणि अनेकांना अपंगत्वाचा सामना करावा लागतो.
नवी मुंबईतील रुकिया बानू (६०) यांना दीर्घकाळ पाठदुखीचा त्रास होता. वेळेवर उपचार न घेतल्याने त्या अंथरुणाला खिळल्या. अखेर अपोलो स्पेक्ट्रा रुग्णालयात शस्त्रक्रिया करून त्या आता कोणत्याही आधाराशिवाय चालतात. दुसऱ्या प्रकरणात, मिताली देवूळकर (५०) या दोन वर्षांहून अधिक काळ चालू शकत नव्हत्या. दोन्ही पाय सुन्न होऊ लागल्यावर त्यांनी अपोलोमध्ये उपचार घेतले आणि शस्त्रक्रियेनंतर त्या पुन्हा चालू लागल्या.
आधी पन्नाशीवरील रुग्ण पाठदुखीसाठी यायचे, आता मात्र १८ वर्षांच्या तरुणांमध्येही तीव्र वेदनांसह रुग्ण येत आहेत. बरेच जण शस्त्रक्रियेच्या भीतीने उपचार टाळतात आणि मेडिकलमधून औषधे घेऊन वेदना सहन करतात; मात्र ८० ते ९० टक्के पाठदुखीच्या घटना औषधे व थेरपीद्वारेच बऱ्या होतात. केवळ गंभीर प्रकरणांमध्येच शस्त्रक्रियेची आवश्यकता भासते. अपोलो स्पेक्ट्रा रुग्णालयातील स्पाईन सर्जन डॉ. कुणाल भारद्वाज यांनी सांगितले, की बैठी शैली, रस्त्यामधील खड्डे, चुकीच्या पद्धतीने व्यायाम यामुळे सध्या पाठीचे आजार वाढू लागले आहेत. पाठीचे आरोग्य राखण्यासाठी जीवनशैलीत बदल आवश्यक आहे. नियमित व्यायाम, वजनावर नियंत्रण, संतुलित आहार आणि व्यसनमुक्त जीवनशैली ही आजच्या तरुणांसाठी काळाची गरज आहे. पाठदुखीकडे दुर्लक्ष न करता तज्ज्ञांचा सल्ला वेळेवर घेतल्यास शस्त्रक्रियेशिवायही या त्रासावर मात करता येते, असे जेजेतील मणका विकारतज्‍ज्ञ डॉ. धीरज सोनवणे यांनी सांगितले.