कीटकनाशक विभागाला कायमस्वरूपी प्रमुख कधी?
मलेरिया, डेंगी, चिकुनगुनियाची रुग्णसंख्या वाढली
सकाळ वृत्तसेवा
मुंबई, ता. ९ : मुंबईत मॉन्सूनच्या आगमनासोबतच मलेरिया, डेंगी, चिकुनगुनिया आणि लेप्टोस्पायरोसिससारख्या आजारांचे प्रमाण वाढू लागले आहे. दरम्यान, या रोगांचे मूळ कारण ठरणाऱ्या डास व उंदीर नियंत्रणासाठी महापालिकेच्या कीटकनाशक विभागाला अद्याप कायमस्वरूपी प्रमुख अधिकारी मिळालेला नाही. त्यामुळे पावसाळ्यात होणाऱ्या साथींचा मुकाबला महापालिका कसा करणार, असा प्रश्न निर्माण झाला आहे.
सध्या महापालिका रुग्णालयांमध्ये दररोज मलेरिया आणि डेंगूचे चार ते पाच संशयित रुग्ण समोर येत आहेत. आरोग्य विभागाने अशा रुग्णांसाठी उपचाराच्या तयारीबाबत दावा केला असला तरी कीटकनाशक विभागाचे नेतृत्व सध्या कायमस्वरूपी अधिकाऱ्याविना सुरू आहे. चेतन चौबळ सेवानिवृत्त झाल्यानंतर उप-कीटकनाशक अधिकारी अमृत सूर्यवंशी यांच्याकडे तात्पुरता अतिरिक्त कार्यभार देण्यात आला आहे.
महापालिकेच्या एका वरिष्ठ अधिकाऱ्याने सांगितले, की या पदासाठी नियुक्ती महाराष्ट्र लोकसेवा आयोगामार्फत (एमपीएससी) केली जाणार आहे. दरम्यान, या पदासाठी एमपीएससी कधी जाहिरात काढणार आणि विभागाला नवे प्रमुख अधिकारी कधी मिळणार याची निश्चित माहिती कुणाकडेच नाही.
महापालिकेच्या कार्यकारी आरोग्य अधिकारी डॉ. दक्षा शाह यांनी सांगितले, की मुंबईतील कोणत्याही रुग्णामध्ये गंभीर लक्षणे दिसून आलेली नाहीत आणि याचे श्रेय लसीकरण मोहिमेला जाते. त्यांनी नागरिकांना मास्क वापरणे, सामाजिक अंतर राखणे आणि स्वच्छता राखण्याचा सल्ला दिला.