अकरावी प्रवेशाचा बोजवारा सुरूच
शून्य फेरीची गुणवत्ता यादी जाहीर होणार विलंब
सकाळ वृत्तसेवा
मुंबई, ता. ११ ः अकरावीच्या ऑनलाइन प्रवेश प्रक्रियेत महिनाभरापासून सुरू असलेला गोंधळ अद्याप सुरूच आहे. विविध कोट्याच्या प्रवेशाची शून्यफेरीची गुणवत्ता यादी बुधवारी सायंकाळी पाच वाजता जाहीर होणार होती; परंतु रात्री उशिरापर्यंत यादी शिक्षण संचालनालयाला जाहीर करता आली नाही. त्यामुळे अकरावी प्रवेशाचा पुन्हा एकदा बोजवारा उडाला आहे.
अकरावीच्या अल्पसंख्याक, व्यवस्थापन आणि इनहाऊस कोट्यातील प्रवेशासाठी शून्य फेरी आणि तिची गुणवत्ता यादी ही कॅप राऊंडच्या गुणवत्ता यादीपूर्वी जाहीर केली जाते; मात्र प्रवेश प्रक्रियेचे संकेतस्थळ आणि यंत्रणेतील त्रुटींमुळे रात्री उशिरापर्यंत यादी शिक्षण संचालनालयाला जाहीर करता आली नाही. त्यामुळे लाखो विद्यार्थ्यांना या अनागोंदी कारभाराचा फटका बसला. शून्य फेरीची गुणवत्ता यादी रखडल्याने या फेरीत प्रवेशास पात्र ठरलेल्या विद्यार्थ्यांचा कॅप राऊंडच्या प्रवेशासाठी मोठा गोंधळ होण्याची भीती व्यक्त केली जात आहे. दरम्यान, रात्री उशिरा ही यादी विद्यार्थ्यांच्या लॉगिनमध्ये जाहीर करण्यात आली, तर गुरुवारपासून ती महाविद्यालयांना दिसणार असल्याचा दावा वरिष्ठ अधिकाऱ्यांनी केला.