तरुणींचा ऑनलाइन छळ
विकृत तरुणास कर्नाटकमधून बेड्या; मोबाईलमध्ये सापडली १३,५०० छायाचित्रे, १०० बनावट ईमेल आयडी, ११ बनावट अकाउंट
सकाळ वृत्तसेवा
मुंबई, ता. १८ ः इन्स्टाग्रामवर महिला, तरुणींशी मैत्री करून त्यांना ऑनलाइन अश्लील कृती करण्यास भाग पाडणाऱ्या, तसे न केल्यास त्यांच्या नावे बनावट अकाउंट तयार करून बदनामी करणाऱ्या तरुणास दहिसर पोलिसांनी कर्नाटक येथून बेड्या ठोकल्या.
शुभम सिंग (२५) असे या आरोपीचे नाव असून, त्यास कर्नाटकच्या सांदूर भागातून अटक करण्यात आली. त्याच्या मोबाईलची तपासणी केली असता शंभरहून अधिक महिलांच्या नावे बनावट ईमेल आयडी, ११ बनावट इन्स्टाग्राम आयडी आणि तब्बल १३,५०० महिला, तरुणींचे फोटो (स्क्रीनशॉट) आढळले. यातील ईमेल आणि इन्स्टाग्राम अकाउंटचा वापर आरोपी गुन्ह्यासाठी करीत होता. अटक आरोपी कर्नाटक येथे खासगी सुरक्षा रक्षक म्हणून कार्यरत होता. २०१५मध्ये त्याने दिल्ली येथील एका खासगी शिक्षण संस्थेतून सॉफ्ट स्किल कॉम्प्युटर ट्रेनिंग शिक्षण घेतले होते, अशी माहिती पोलिसांनी दिली.
उत्तर मुंबईत राहणाऱ्या महाविद्यालयीन तरुणीने दिलेल्या तक्रारीनुसार तिच्या नावे अनोळखी व्यक्तीने समाजमाध्यमांवर विशेषतः इन्स्टाग्रामवर अनेक बनावट खाती तयार केली आहेत. त्याद्वारे या व्यक्तीने त्या तरुणीविषयी अश्लील संदेश, स्टोरी सर्वदूर पसरवली. या तक्रारीची गंभीर दखल घेत उपायुक्त महेश चिमटे, वरिष्ठ निरीक्षक अशोक होनमाने यांच्या मार्गदर्शनाखाली सहाय्यक निरीक्षक अंकुश दांडगे, उपनिरीक्षक श्रद्धा पाटील, अंमलदार अमित पाटील, कुदळे, श्रीकांत देशपांडे, चिटणीस, चव्हाण, बिडगर आणि सोनल म्हस्के या पथकाने तांत्रिक तपास करून कर्नाटक गाठले आणि आरोपीस बेड्या ठोकल्या.
आरोपी समाजमाध्यमांवर ओळख झालेल्या महिला, तरुणींना नग्न व्हिडिओ कॉल करण्यास, छायाचित्रे पाठवण्यास सांगे. त्यास नकार देताच बनावट अकाउंट तयार करून बदनामी करण्याची धमकी देत असे. तरीही नकार कायम राहिल्यास आरोपी अशा महिला, तरुणींच्या नावे बनावट अकाउंट तयार करून बदनामी करीत होता.