मुंबईच्या तरुणाची पुण्यात हत्या
लातूरमधून आरोपी ताब्यात
मुंबई, ता. २४ ः मानखुर्द येथील कॅब चालक तरुणाची पुण्यात हत्या करणाऱ्या व्यक्तीस पोलिसांनी लातूर येथून ताब्यात घेतले. आरोपी आणि मृत तरुण मित्र होते. कारच्या व्यवहारात दोघांमध्ये वाद होते, असे पोलिसांनी सांगितले.
मोहम्मद सलीम अन्सारी (३०) असे मृत तरुणाचे नाव आहे. तो १८ जूनपासून बेपत्ता होता. पोलिसांनी दिलेल्या माहितीनुसार, भाडे घेऊन तो पुण्याला गेला होता. त्यानंतर त्याच्याशी संपर्क होत नव्हता. कुटुंबाने दिलेल्या तक्रारीआधारे पोलिसांनी त्याचा शोध सुरू केला. पुण्याच्या भोसरी परिसरात त्याची कार सापडली. तसेच उर्स टोलनाक्याजवळ एकाची हत्या झाल्याची माहिती पथकाला मिळाली. तो मृतदेह सलीम याचाच असल्याचे स्पष्ट झाले. तांत्रिक तपास, टोलनाक्यावरील सीसीटीव्हीच्या चित्रणाआधारे पोलिसांनी आरोपीची ओळख पटवून त्याला लातूर येथून ताब्यात घेतले.