रेल्वेची आठ तासआधी आरक्षण यादी

सकाळ वृत्तसेवा
मुंबई, ता. ७ : प्रवाशांना अधिक चांगली आणि नियोजनबद्ध सेवा देता यावी, यासाठी रेल्वे प्रशासनाने महत्त्वाचा निर्णय घेतला आहे. मेल आणि एक्स्प्रेस गाड्यांच्या आरक्षण यादी तयार करण्याच्या वेळेत बदल केला आहे. आता ट्रेनच्या सुटण्याच्या आठ तासआधी पहिली यादी तयार केला जाणार आहे.

सध्या गाडी सुटण्याच्या चार तासआधी आरक्षण यादी प्रसिद्ध केली जाते; मात्र रेल्वे मंडळाच्या नव्या निर्णयानुसार १० जुलै २०२५ पासून ही वेळ वाढवण्यात आली आहे. त्यामुळे प्रवाशांना त्यांचा प्रवास पूर्वनियोजित करण्यास अधिक मदत होणार आहे. या नव्या प्रणालीमुळे प्रवाशांना रिक्त असलेल्या आसनासाठी आरक्षण करण्याची संधी शेवटच्या क्षणापर्यंत मिळणार आहे. त्यामुळे शेवटच्या क्षणी होणारा गोंधळ, गर्दी आणि अनिश्चितता टाळता येणार आहे.

.....
आरक्षण यादीच्या नवीन वेळा
- सकाळी ५ ते दुपारी २ वाजेपर्यंत सुटणाऱ्या गाड्यांसाठी मागील रात्री ९ वाजता पहिली यादी तयार होणार
- दुपारी २ नंतर ते पहाटे ५ वाजेपर्यंत सुटणाऱ्या गाड्यांची पहिली यादी गाडी सुटण्याच्या आठ तासआधी प्रसिद्ध केली जाईल
- दुसऱ्या व अंतिम आरक्षण यादीच्या वेळेत कोणताही बदल करण्यात आलेला नाही. अंतिम यादी नेहमीप्रमाणे गाडी सुटण्याच्या ३० मिनिटेआधी तयार केली जाईल.