सिद्दीकींचा मोबाईल क्रमांक
चोरण्याचा प्रयत्न
मुंबई, ता. ७ : राष्ट्रवादी काँग्रेसचे दिवंगत नेते आणि माजी मंत्री बाबा सिद्दीकी यांचा मोबाईल क्रमांक दुसऱ्या सिमवर सुरू करण्याचा प्रयत्न करणाऱ्या दिल्लीतील व्यक्तीस मुंबई पोलिसांनी अटक केली आहे. विवेक सबरवाल (राहणार बुराडी, दिल्ली) असे अटक झालेल्या आरोपीचे नाव आहे.

सिद्दीकी यांच्या निधनानंतर त्यांच्या कुटुंबीयांनी त्यांचा मोबाईल क्रमांक सुरू ठेवला होता. बँक आणि व्यवसायाशी संबंधित व्यवहारांसाठी तो क्रमांक आवश्यक होता. २४ जूनला त्यांच्या पत्नी शेहझीन सिद्दीकी यांच्या नावाने एक ई-मेल आला. ज्यामध्ये मोबाईल क्रमांकासाठी अधिकृत स्वाक्षरी हक्काबाबत विचारणा करण्यात आली होती. त्यात आधार कार्ड, पॅन कार्ड, जीएसटी क्रमांक आणि कुटुंबाच्या कंपनीचे लेटरहेड वापरण्यात आले होते. फसवणुकीचा हा प्रकार लक्षात आल्यानंतर वांद्रे पोलिस ठाण्यात तक्रार दाखल झाली. तांत्रिक तपासातून आरोपी दिल्लीतील असल्याचे समजताच वांद्रे पोलिसांनी दिल्ली पोलिसांच्या मदतीने आरोपीला अटक केली. आरोपीकडे याआधीही सायबर फसवणुकीचे गुन्हे दाखल असल्याचे समोर आले आहे.
या प्रकरणाचा तपास सुरू असून आरोपीने नेमका बाबा सिद्दीकी यांचाच मोबाईल क्रमांक का निवडला, याचा पोलिस तपास करीत आहेत.
.........