राज्य सहकारी शिक्षण संघाचा
शिक्षण निधी पूर्ववत करा : प्रवीण दरेकर
मुंबई, ता. ९ : महाराष्ट्र राज्य सहकारी संघाचा, महाविकास आघाडी सरकारच्या काळात बंद केलेला निधी पुन्हा सुरू करावा, अशी मागणी विधान परिषदेतील भाजप गटनेते प्रवीण दरेकर यांनी आज केली. पुरवणी मागण्यांवर ते बोलत होते.
या संघातर्फे प्रशिक्षण देण्याचे काम होते व त्याला पूर्वी शिक्षण निधी मिळत होता. राज्यात दोन ते अडीच लाख संस्था असून, त्या शिक्षण निधी देत असत. त्यानुसार प्रत्येक जिल्ह्यात सहकारी बोर्डाचे काम चालत असे, पण मविआ सरकारच्या काळात हा निधी बंद करण्यात आल्याने संघाच्या ७०० कर्मचाऱ्यांवर उपासमारीची वेळ आली आहे. प्रशिक्षणाला केंद्र व राज्य सरकारने महत्त्व दिले असल्यामुळे हा निधी पूर्ववत करावा, अशी मागणी दरेकर यांनी केली.
कोकणातील रायगड, रत्नागिरी, सिंधुदुर्ग हे जिल्हे पुरांमुळे होरपळलेले आहेत. त्यासंदर्भातील विकासकामे संथ गतीने होत आहेत. अशा स्थितीत महाडसारख्या ठिकाणी आपत्कालीन निवारा केंद्र उभारावे. त्यामुळे नैसर्गिक आपत्तीच्या घटनांमध्ये लोकांना निवारा मिळेल, असेही दरेकर यांनी दाखवून दिले.