तळवलकर कंपनीवर ईडीचे छापे

मुंबई, ता. ११ : तळवलकर बेटर व्हॅल्यू फिटनेस लिमिटेड कंपनीशी संबंधित मुंबई, पुण्यासह गोवा आणि चेन्नई येथील १५ ठिकाणांवर सक्तवसुली संचालनालयाने (ईडी) बुधवारी (ता. ९) छापे घातले. या कारवाईत आठ लाख रुपयांची बेहिशेबी रोकड, परदेशी गुंतवणुकीशी संबंधित कागदपत्रे आणि मुंबई, नागपूर, गोव्यातील मालमत्तांची माहिती हाती लागल्याचा दावा ईडी प्रवक्त्याने केला. तळवलकर बेटर व्हॅल्यू फिटनेस लिमिटेड कंपनीवर ॲक्सिस आणि लक्ष्मी विलास बँकेची सुमारे ३८० कोटींना फसवणूक केल्याचा आरोप आहे. याप्रकरणी दाखल गुन्ह्याचा आधार घेत ईडीने आर्थिक गैरव्यवहारांच्या संशयावरून स्वतंत्र तपास सुरू केला आहे. या कंपनीने ॲक्सिस बँकेकडून २०६.३५ कोटी आणि लक्ष्मी विलास बँकेकडून १८० कोटींचे कर्ज घेतले होते; मात्र ही रक्कम बोगस कंपन्यांच्या खात्यांत वळवून कंपनीने अन्य हेतू साध्य केले, परदेशी गुंतवणूक केली, मालमत्ता विकत घेतल्या, असा संशय ईडीला आहे.