मुंबई रेल्वे विकास महामंडळाचा
२६वा वर्धापनदिन उत्साहात
सकाळ वृत्तसेवा
मुंबई, ता. १२ : मुंबई उपनगरी रेल्वेचा चेहरामोहरा बदलण्यासाठी काम करणाऱ्या मुंबई रेल्वे विकास महामंडळाचा (एमआरव्हीसी) २६वा वर्धापनदिन शनिवारी उत्साहात साजरा करण्यात आला. रेल्वे मंत्रालय आणि राज्य सरकारच्या संयुक्त उपक्रमातून स्थापन झालेल्या या संस्थेने उपनगरी रेल्वेसाठी गेल्या दोन दशकांपासून मोठे योगदान दिले आहे.
महामंडळाचे अध्यक्ष आणि व्यवस्थापकीय संचालक विलास वाडेकर यांनी संस्थेच्या वाटचालीचा आढावा घेत आगामी योजनांची माहिती दिली. आम्ही केवळ रेल्वेचे रूळ टाकत नाही, तर लाखो प्रवाशांच्या दैनंदिन प्रवासात विश्वास, सुविधा आणि सुरक्षिततेसाठी बळ देतो. पर्यावरणपूरक आणि टिकाऊ भविष्यासाठी काम करीत आहोत.
‘मिशन झीरो डेथ्स’, पावसाळ्यातील पूरनियंत्रण उपाय, कवच-५ आणि इंटरमोडल ट्रान्सपोर्ट सिस्टीम यांसारखे महत्त्वाचे प्रकल्प राबवण्यात आले. हे सर्व प्रकल्प पंतप्रधानांच्या ‘विकसित भारत’ संकल्पनेशी सुसंगत आहेत, असे ते म्हणाले. दरम्यान, मुंबईसारख्या दाट आणि गुंतागुंतीच्या शहरात काम करणे हे आव्हानात्मक आहे; मात्र प्रत्येक प्रकल्प संघभावनेच्या प्रयत्नांमुळे यशस्वी होतो, असे परियोजना संचालक राजीव श्रीवास्तव यांनी सांगितले. या वेळी एमआरव्हीसीच्या प्रगतीवर आधारित लघुपटाचे सादरीकरण करण्यात आले. पूर्ण झालेल्या आणि सुरू असलेल्या प्रकल्पांची माहिती या चित्रफितीतून देण्यात आली.