घाटकोपरमध्ये बेस्ट चालकाला मारहाण

मुंबई : वाहतूक खोळंब्यात किंचित धक्का लागल्याने दुचाकीस्वार तरुणाने भररस्त्यात बेस्ट बसचालकाला बेदम मारहाण केली. या हल्ल्यात चालक जखमी झाला आहे. दरम्यान, हल्लेखोर तरुणाला पोलिसांनी ताब्यात घेतले आहे. हा प्रकार रविवारी (ता. १३) सायंकाळी सातच्या सुमारास घाटकोपर पश्चिमेकडील मेट्रो पुलाखाली घडला. प्राजक्त खरात (वय १८) असे आरोपीचे नाव आहे. तो त्याच्या मित्रासोबत दुचाकीवरून जात होता. मेट्रो पुलाखाली वाहतूक कोंडी होती. प्राजक्तच्या दुचाकीमागे घाटकोपर आगार-गोरेगाव या मार्गिकेवर धावणारी बस खोळंबली होती. बसचा हलका धक्का प्राजक्तच्या दुचाकीला लागला. त्यानंतर प्राजक्तने दुचाकी बसपुढे आडवी लावून चालक सुनील धानापुने (वय ४८) यांना बेदम मारहाण केली. त्यात ते जखमी झाले. हा प्रकार सुरू असताना बस वाहकाने पोलिस नियंत्रण कक्षाकडे मदत मागितली. लगोलग घाटकोपर पोलिस घटनास्थळी दाखल झाले. त्यांनी आरोपी प्राजक्तला ताब्यात घेतले आणि चालक सुनील यांना राजावाडी रुग्णालयात उपचारासाठी नेले. याप्रकरणी प्राजक्तविरोधात गुन्हा नोंदवण्यात आल्याचे घाटकोपर पोलिसांनी सांगितले.