मुंबई, ता. १६ : मराठी संगीत रंगभूमीवरील ज्येष्ठ गायक, अभिनेते दिवंगत अरविंद पिळगावकर यांच्या आठवणी संग्रहीत असलेल्या तपस्या नेवे यांनी संपादित केलेल्या ‘कोहम् सोहम्’ या पुस्तकाचे प्रकाशन सांस्कृतिक मंत्री ॲड. आशीष शेलार यांच्या हस्ते करण्यात आले. या वेळी रवींद्र नाट्यगृहात संगीत नाटकासाठी २५ टक्के सवलत देण्याचा निर्णय त्यांनी घोषित केला.
अरविंद पिळगावकर यांच्या जीवनकार्यावर आधारित पुस्तकावर भाष्य करताना सांस्कृतिक कार्य मंत्री ॲड. आशीष शेलार यांनी हे पुस्तक संगीत रंगभूमीचा, शास्त्रीय संगीत आणि उपशास्त्रीय संगीत परंपरेचा इतिहास उलगडणारे आहे. मुंबईच्या सांस्कृतिक घडामोडींच्या नोंदी या पुस्तकात आहेत. त्यामुळे हे पुस्तक जरूर वाचावे. या वेळी ज्येष्ठ अभिनेत्री नयना आपटे, गायक अजित कडकडे, दिनेश पिळगावकर, रामदास भटकळ यांच्यासह विविध मान्यवर उपस्थित होते.
-------------------------------
सुट्टीच्या दिवसात प्रेक्षकांसाठी पर्वणी
संगीत नाटकांना प्रोत्साहन देण्यासाठी शासनाने रवींद्र नाट्यमंदिर सवलतीत देण्याचा निर्णय घेतला आहे. त्यानुसार शनिवार, रविवार व सुट्टीचे दिवस रवींद्र नाट्यगृहाची २४ सत्र, लघू नाट्यगृहाची १२ सत्र सकाळी ९.३० ते दुपारी २ या कालावधीत २५ टक्के सवलतीच्या दरात उपलब्ध करून देण्यात येतील, अशी घोषणा मंत्री शेलार यांनी केली.