मुंबई, ता. १६ ः आयकर विभागाने ३३ कोटींची मालमत्ता जप्त केल्याचे निमित्त करून बालपणीच्या मैत्रिणीकडून तब्बल सव्वा कोटी रुपये उकळल्याच्या आरोपात शिवाजी पार्क पोलिसांनी संदीप धनवडे या तरुणाविरोधात गुन्हा नोंदवला. फसवणूक करणारी व्यक्ती तक्रारदाराचा बालपणीचा मित्र आहे.
आयटी कंपनीत उपाध्यक्ष असून महिन्याला सहा लाख रुपये पगार असल्याचे संदीपने महिलेला सांगितले होते; मात्र आयकर विभागाने ३३ कोटी रुपयांची मालमत्ता गोठवली असून ती सोडविण्यासाठी दीड ते दोन कोटींची आवश्यकता आहे. तसेच दादर किंवा माटुंगा येथील सुमारे पाच कोटींचे घर नावे करेन, असे प्रलोभन महिलेला दाखवले होते. यातूनच महिलेने सर्व जमापुंजी, परिचितांकडून उसने घेऊन, दागिने गहाण ठेवून, विकून, कर्ज घेऊन १.२५ कोटी रुपये संदीपला दिले; मात्र परत केले नाहीत, तसेच ठरल्याप्रमाणे मालमत्ता नावे केली नसल्याने महिलेने पोलिसांकडे तक्रार केली होती.