कामाठीपुरा पुनर्विकासासाठी म्हाडाला नियोजन प्राधिकरणाचा दर्जा

सकाळ वृत्तसेवा
मुंबई, ता. १६ : कामाठीपुराच्या पुनर्विकासासाठी म्हाडाने कंबर कसलेली असतानाच आता नगरविकास विभागाने या प्रकल्पासाठी नियोजन प्राधिकरण म्हणून म्हाडाला दर्जा दिला आहे. गेल्या दीड वर्षापासून मुंबई महापालिका आणि म्हाडामध्ये नियोजन प्राधिकरणावरून रस्सीखेच सुरू होती; मात्र राज्य सरकारच्या निर्णयानुसार नगरविकास विभागाने म्हाडाला नियोजन प्राधिकरणाचा दर्जा दिल्याची माहिती सूत्रांनी दिली. त्याबाबतचा शासन निर्णय लवकरच जारी केला जाणार आहे.
कामाठीपुरा हा सुमारे ३४ एकर जागेवर वसला असून येथे ७७१ जुन्या मोडकळीस आलेल्या इमारतींमध्ये जवळपास आठ हजार रहिवासी वास्तव्याला आहेत. या परिसराचा समूह पुनर्विकास बीडीडी चाळ पुनर्विकासाप्रमाणे म्हाडाच्या माध्यमातून केला जाणार असून त्याबाबतचे संपूर्ण नियोजन करण्यात आले आहे; मात्र या ठिकाणी सध्या मुंबई महापालिका नियोजन प्राधिकरण म्हणून काम करीत आहे. त्यामुळे पुनर्विकासाला वेग देता यावा म्हणून म्हाडाने या प्रकल्पासाठी आपल्याला नियोजन प्राधिकरणाचा दर्जा देण्याची मागणी केली होती, त्याला राज्य सरकारने २०२३ मध्ये मंत्रिमंडळाच्या कॅबिनेटमध्ये मंजुरी दिली होती, त्याच वेळी पालिकेने आपल्यालाच नियोजन प्राधिकरण कायम ठेवावे, असे स्पष्ट केले होते. त्यामुळे नगरविकास विभागाने अध्यादेश काढला नव्हता. परिणामी, गेल्या दीड वर्षापासून म्हाडा आणि पालिकेत रस्सीखेच सुरू होती, त्यामध्ये म्हाडाने बाजी मारली आहे.
--------