एसटीची गोपनीय तपासणी मोहीम सोशल मीडियावर

सकाळ वृत्तसेवा
मुंबई, ता. १६ : एसटीवाहकांच्या तपासणीसाठी मार्ग तपासणी पथकाला जो कार्यक्रम दिलेला आहे, तो अत्यंत गोपनीय असतो, मात्र हाच कार्यक्रम समाजमाध्यमांवर व्हायरल झाल्यामुळे सर्व वाहक सतर्क झाल्याने महामंडळाची गोपनीयता चव्हाट्यावर आली आहे.

वाहक स्वतःच्या आर्थिक लाभासाठी प्रवाशांकडून तिकिटाचे पैसे घेऊनही तिकीट देत नसल्याची अनेक प्रकरणे समोर आली आहेत. यात महामंडळाचे मोठे नुकसान होत आहे. यावर आळा घालण्याकरिता महामंडळाच्या तपासणी पथकाची नियुक्ती करण्यात आली असून, वेळोवेळी धडक कारवाई केली जाते.
यामध्ये तिकिटाच्या रकमेसह दंडही वसूल केला जातो. तसेच विनातिकीट प्रवास करणाऱ्या प्रवाशांवर भरारी पथकाद्वारे कारवाई केली जाते. अशा प्रवाशांकडून तिकिटाची रक्कम व दंड वसूल केला जातो. १५ ते १८ जुलै या कालावधीत मार्ग तपासणी कार्यक्रम राबविण्यात येणार होता. या कार्यक्रमात मार्ग तपासणी करून दोषी प्रवासी आणि वाहकांवरदेखील कारवाई करण्यात आली असती, मात्र हा कार्यक्रम व्हायरल झाल्याने प्रवासी आणि वाहक सतर्क झाले आहेत. दरम्यान, एसटी महामंडळाचा गोपनीय कार्यक्रम व्हायरल झाल्याबद्दल महामंडळाचे उपाध्यक्ष व व्यवस्थापकीय संचालक डॉ. माधव कुसेकर यांच्याशी संपर्क होऊ शकला नाही.