सकाळ वृत्तसेवा
मुंबई, ता. १९ : पावसाळ्यातील दमट हवामानाचा माणसांसह पाळीव प्राण्यांवरही परिणाम जाणवत आहे. विशेषतः श्वानांमध्ये हे प्रमाण अधिक असून केस गळणे, अ‍ॅलर्जी, त्वचा विकाराचा संसर्ग अधिक वाढला आहे.
मुंबईत पाळीव प्राण्यांमध्ये त्वचारोगाचे प्रमाण तब्बल २५ टक्क्यांनी वाढले आहे. प्राण्याच्या वयानुसार आणि शरीररचनेनुसार त्यांच्या आहारात प्रथिने, फायबर आणि इतर पोषणतत्त्वांची गरज वेगळी असते. त्यामुळे पशुवैद्यकीय सल्ल्यानुसारच संतुलित तसेच योग्य आहार द्यावा, अशी माहिती पशुवैद्यकीयतज्ज्ञांनी दिली. पावसाळ्यात प्राण्यांना त्वचेवर संसर्गाची शक्यता वाढते.
---------------------------
काळजी कशी घ्यावी?
कोरडे ठेवा : पावसातून आल्यावर शरीर पुसा, कोरडं करा.
घराबाहेर कमी वेळ : भिजणं टाळा; सुरक्षित जागा तयार करा.
आहारावर लक्ष : सहज पचणारा, पोषक आणि ताजा आहार द्या.
नियमित तपासणी : लसीकरण, कीडनाशक औषधं, डॉक्टरांकडून तपासणी आवश्यक.
किडा/चिलट नियंत्रण : औषध फवारणी करा; गंधहीन कीटकनाशक वापरा.
................................
आढळणारे आजार
- पाच ते सहा पाळीव प्राण्यांमध्ये कर्करोग आढळतो, तर तेवढेच प्राणी हृदयरोगाने ग्रस्त असतात.
- प्रत्येक तिसऱ्या पाळीव प्राण्याला पचनाच्या समस्या दिसून येतात.
- पावसाळ्यात प्रत्येक पाचव्या पाळीव प्राण्याला टिक फिव्हरचा त्रास.
--------------------------------
झिग्लीचे मुंबईत रुग्णालय
मुंबईत झिग्लीतर्फे पहिले पाळीव प्राणी रुग्णालय आणि एक्सपीरियन्स केंद्र सुरू झाले. या केंद्रात सल्ला सेवा, उपचार, प्रगत निदान, पॅथॉलॉजी, रेडिओलॉजी, अल्ट्रासोनोग्राफी, लसीकरण, शस्त्रक्रिया, कुत्रे आणि मांजरींसाठी विशेष दंतचिकित्सा सेवा दिली जाणार असल्याचे झिग्लीचे मुख्य पशुवैद्यक डॉ. दीपक सारस्वत यांनी सांगितले.
--------------------------------
रुग्णालयात त्वचा विकाराचे एक ते दोन प्राणी येत आहेत. त्वचा विकाराचे उपचार अधिक काळ चालत असल्याने गरजेइतकेच दाखल करून घेतो. अन्य प्राण्यांना ओपीडीवर तपासून घरी पाठवण्यात येते.
- डॉ. मयूर डंगर, बैलघोडा रुग्णालय, परळ