तत्कालीन तपास अधिकाऱ्याचे मृत्यू प्रकरण पुन्हा ताजे

मुंबई, ता. २२ : उच्च न्यायालयाच्या निकालानंतर ७/११ बॉम्बस्फोट मालिकेचा तपास करणाऱ्या राज्य दहशतवादविरोधी पथकाचे (एटीएस) तत्कालीन सहाय्यक आयुक्त विनोद भट यांचे अपघाती मृत्यू प्रकरण पुन्हा ताजे झाले आहे.

२८ ऑगस्ट २००६ रोजी माटुंगा आणि दादर स्थानकांदरम्यान रेल्वे रुळांवर भट यांचा मृतदेह सापडला. रेल्वे अपघातात त्यांचा मृत्यू झाला, असे तेव्हा एटीएसमधील वरिष्ठ सहकाऱ्यांनी सांगितले होते; मात्र दादरच्या कीर्ती महाविद्यालयाशेजारी राहणारे आणि शासकीय वाहनाने घरी निघालेले भट टिळक पुलावर उतरले. ओळखपत्रवगळता वैयक्तिक साहित्य चालक पोलिसाकडे देत हे माझ्या पत्नीकडे दे, असे सांगून चालत पुढे निघाले. त्यावरून त्यांनी आत्महत्या केली, हे स्पष्ट झाले. मुंबई पोलिस दलात प्रामाणिक अधिकारी म्हणून ओळख असलेल्या भट यांनी टोकाचे पाऊल का उचलले, यावरून तेव्हा उलटसुलट चर्चा सुरू झाली. ७/११ प्रकरणात वरिष्ठांनी अवैध गोष्टी करण्यास प्रचंड दबाव आणला. त्या गोष्टी भट यांच्या तत्त्वात बसत नव्हत्या. त्यामुळे त्यांनी आत्महत्या केली, असा एक प्रवाह तेव्हा होता. या प्रवाहाला २०१५मध्ये विशेष मकोका न्यायालयाने निर्दोष सोडलेल्या वाहिद शेख याने बळकट केले. सुटकेनंतर त्याने लिहिलेल्या ‘बेगुनाह कैदी’ या पुस्तकात भट यांच्यावर वरिष्ठांचा प्रचंड दबाव होता, असे उल्लेख आहेत. भट आणि फाशीची शिक्षा झालेला आरोपी यांच्यातील संभाषणाचे दाखलेही दिले आहेत. हे आरोप तत्कालीन एटीएस अधिकाऱ्यांनी झुगारले होते, असे अनेक आरोप आरोपींनी खटल्यादरम्यान विशेष मकोका न्यायालयात केले होते. मात्र न्यायालयाने ते आधारहीन आरोप फेटाळून लावत आरोपींना शिक्षा ठोठावली, अशी प्रतिक्रिया या अधिकाऱ्यांनी दिली होती.

आरोप ग्राह्य
आरोपींचे काही दावे सोमवारी उच्च न्यायालयाने ग्राह्य धरले. आरोपींचा अनन्वित छळ करून त्यांनी (पोलिसांनी) हवा तसा कबुलीजबाब मिळवला, हा आरोप न्यायालयाने ग्राह्य धरला. त्यामुळे भट यांच्या मृत्यूनंतर झालेले आरोपही खरेच होते का, याबाबत पोलिस दलात चर्चा सुरू आहे.