वंदे भारत ट्रेनला वलसाड थांबा

सकाळ वृत्तसेवा
मुंबई, ता. २३ : प्रवाशांच्या सोयीसाठी पश्चिम रेल्वेने मुंबई सेंट्रल ते गांधीनगर कॅपिटल वंदे भारत एक्स्प्रेसला वलसाड येथे अतिरिक्त थांबा देण्याचा निर्णय घेतला आहे. हा थांबा प्रायोगिक तत्त्वावर देण्यात आला असून, २७ जुलैपासून त्याची अंमलबजावणी होणार आहे.
पश्चिम रेल्वेचे मुख्य जनसंपर्क अधिकारी विनीत अभिषेक यांनी दिलेल्या माहितीनुसार, ट्रेन क्र.२०९०१ मुंबई सेंट्रल-गांधीनगर कॅपिटल वंदे भारत एक्स्प्रेस २७ जुलैपासून वलसाड येथे थांबेल. हा गाडी सकाळी ८.१९ वाजता वलसाड स्थानकात पोहोचेल व ८.२१ वाजता पुढे रवाना होईल. या अतिरिक्त थांब्यामुळे सुरत, वडोदरा, आणंद आणि अहमदाबाद येथील वेळापत्रकात काही फेरबदल करण्यात आले आहेत. तसेच, ट्रेन क्र. २०९०२ गांधीनगर कॅपिटल-मुंबई सेंट्रल वंदे भारत एक्स्प्रेस २७ जुलैपासून वलसाड येथे सायंकाळी ५.५१ वाजता पोहोचेल व ५.५३ वाजता पुढे रवाना होईल. त्यामुळे ही गाडी गांधीनगरहून आता २.०५ ऐवजी २.०० वाजता सुटेल. या बदलाचा परिणाम अहमदाबाद, आणंद, वडोदरा आणि सुरत येथील वेळापत्रकावर झाला आहे. नवीन वेळापत्रक लवकरच उपलब्ध करून देण्यात येणार आहे, अशी माहिती रेल्वे प्रशासनाने दिली आहे.