परळ टीटी उड्डाणपुलाच्या दुरुस्तीचे काम पावसाळ्यानंतर
१३ कोटी ८२ लाख रुपयांचा खर्च अपेक्षित
सकाळ वृत्तसेवा
मुंबई, ता. ३० ः मुंबई शहरासाठी महत्त्वाचा असलेला आणि पूर्व उपनगरांशी जोडणाऱ्या परळ टीटी उड्डाणपुलाच्या दुरुस्ती आणि बळकटीकरणासाठी महापालिकेने निर्णय घेतला आहे. पुलाच्या सुरक्षिततेच्या दृष्टीने अत्यंत महत्त्वाच्या कामांसाठी अंदाजे १३ कोटी ८२ लाख रुपयांचा खर्च अपेक्षित असून कंत्राटदाराची निवडही करण्यात आली आहे. ही दुरुस्ती पावसाळ्यानंतर टप्प्याटप्प्याने केली जाणार आहे. या कामामुळे वाहनांसाठी काहीसा अडथळा निर्माण होऊ शकतो.
परळ टीटी उड्डाणपुलाला यंदा ३६ वर्षे पूर्ण झाली असून, २०२३ मध्ये डांबरी पृष्ठभाग खराब झाल्याने अपघाताचा धोका निर्माण झाला होता. त्या वेळी केवळ तात्पुरती डागडुजी करण्यात आली होती. राज्य सरकारने महापालिकेला तातडीने दुरुस्तीचे निर्देश दिले होते. यानंतर महापालिकेने सप्टेंबर २०२४ मध्ये पुलाच्या संपूर्ण बळकटीकरणासाठी निविदा काढली होती. दुरुस्तीचे काम करण्यासाठी उड्डाणपूल बंद केल्यास भायखळा, लालबाग, दादर, सायन आणि पूर्व उपनगरातील प्रवाशांना मोठा फटका बसण्याची शक्यता आहे. सध्या सायन उड्डाणपूलही बंद असल्याने वाहतुकीची जबाबदारी परळ पुलावर आहे, म्हणून हे काम टप्प्याटप्याने करण्यात येणार आहे. या पुलामध्ये सध्या २२ प्रसरण सांधे आहेत. ते कमी करून १० पर्यंत आणण्याचा निर्णय घेण्यात आला आहे. अधिक प्रसरण सांधे हे वाहतुकीसाठी त्रासदायक ठरत असल्याने, काँक्रीटीकरण करून पुलाच्या मजबुतीकरणासह रस्त्याच्या पृष्ठभागालाही नवसंजीवनी दिली जाणार आहे.
लोअर परळ उड्डाणपूल नोव्हेंबर २०२३ मध्ये पूर्णपणे सेवेत आला आहे. त्यामुळे आता परळ टीटी पुलाच्या मोठ्या कामास सुरुवात होणार असून, ऑक्टोबर २०२५ पासून काम सुरू होईल, असे अतिरिक्त आयुक्त अभिजित बांगर यांनी स्पष्ट केले आहे.
.............
-- अंदाजे खर्च - १३.८२ कोटी रुपये
-- कामाचा प्रारंभ - ऑक्टोबर २०२५
-- टप्प्याटप्प्याने मार्गिका बंद करून करणार काम
-- प्रसरण सांधे - २२ वरून १० वर
-- वाहतुकीवर परिणाम होण्याची शक्यता