धारावीत गोळीबार;
महिला जखमी
मुंबई, ता. २८ ः धारावी येथे रविवारी रात्री झालेल्या गोळीबारात फळविक्रीचा व्यवसाय करणारी एक महिला जखमी झाली. या प्रकरणी पोलिसांनी अज्ञात व्यक्तीविरोधात गुन्हा नोंदवला असून तपास सुरू असल्याचे सांगण्यात आले. ही घटना धारावी येथील ९० फुटी मार्गावर घडली. या घटनेत महिलेच्या हाताला जखम झाली. गोळी कोणी, कुठून झाडली याबाबत नेमकी माहिती अद्याप मिळालेली नाही. तसेच गोळीबार या महिलेच्याच दिशेने झाला की गोळी चुकून सुटली आणि महिलेला लागली, याचाही तपास सुरू असल्याचे पोलिसांनी सांगितले. जखमी महिलेवर उपचार सुरू असून तिची प्रकृती स्थिर आहे.