गणेशमूर्ती आगमनात अडथळ्यांचे विघ्न
अडथळे दूर करण्याची समन्वय समितीची मागणी
सकाळ वृत्तसेवा
मुंबई, ता. ३० ः गणेशोत्सव २०२५च्या पार्श्वभूमीवर परळ वर्कशॉप आणि भारतमाता परिसरातून येत्या २ ऑगस्टपासून गणेशमूर्तींचे आगमन मोठ्या प्रमाणावर होणार आहे; मात्र आगमन मार्गावर अनेक अडथळे निर्माण होत असून, त्याबाबत समन्वय समितीने पालिका आणि पोलिस प्रशासनाकडे तातडीने उपाययोजना करण्याची मागणी केली आहे.
बृहन्मुंबई सार्वजनिक गणेशोत्सव समन्वय समितीचे अध्यक्ष ॲड. नरेश दहिबावकर यांनी यासंदर्भात केलेल्या निवेदनात म्हटले आहे, की गतवर्षी प्रशासनाच्या सहकार्यामुळे आगमन सुरळीत झाले होते; मात्र यंदा लटकणाऱ्या केबल्स, वाढलेल्या झाडांच्या फांद्या, भारतमाता व डिलाई रोडवरील अडथळे, सिग्नलचे खांब, तसेच डिलाई रोडसह इतर मार्गांवरील रस्त्याच्या दुतर्फा पार्किंगमुळे आगमनात अडथळे येण्याची शक्यता आहे.
यंदा २ ऑगस्ट आणि त्यानंतर येणाऱ्या शनिवार आणि रविवारी सार्वजनिक गणपती उत्सवांच्या गणेशमूर्तींचे आगमन होत असते. बहुतांश उंच आणि भव्य मूर्तींचा यात समावेश असतो. शिवाय आगमन सोहळा पाहण्यासाठी भक्तांची मोठी गर्दीदेखील होते. त्‍यामुळे काही अडथळे येण्याची शक्यता आहे. याशिवाय वाहतूक कोंडी होण्याची भीतीदेखील असून त्यासाठी लालबाग परिसरातील वाहतूक तिसऱ्या मार्गाने वळवावी, अशीही मागणी करण्यात आली आहे. समितीने प्रशासनाला वेळेत कार्यवाही करण्याचे आवाहन केले असून, गणेशभक्तांच्या सोयीसाठी आगमन मार्ग मोकळा ठेवण्याची गरज अधोरेखित केली आहे.

या आहेत मागण्या
- लटकणाऱ्या केबल्स व फांद्या तातडीने हटवाव्यात
- भारतमाता व डिलाई रोडवरील सिग्नल खांब काढण्यात यावेत
- लालबाग परिसरातील वाहतूक तिसऱ्या पर्यायी मार्गाने वळवावी
- मुख्य रस्त्यांवरील पार्किंगवर तात्पुरती बंदी घालावी