मुंबई विद्यापीठाचा कौशल्य प्रशिक्षण मंडळासोबत करार
मुंबई, ता. ३० : विद्यापीठ अनुदान आयोगाच्या कौशल्य-आधारित उच्च शिक्षणाला प्रोत्साहन देण्यासाठी मुंबई विद्यापीठ आणि भारत सरकारच्या शिक्षण मंत्रालयाच्या कौशल्य प्रशिक्षण मंडळात सामंजस्य करार करण्यात आला. राष्ट्रीय शैक्षणिक धोरणाच्या पाचव्या वर्षपूर्तीनिमित्त नवी दिल्ली येथील भारत मंडपम येथे आयोजित कार्यक्रमात केंद्रीय शिक्षणमंत्री धर्मेंद्र प्रधान यांच्या उपस्थितीत या कराराचे हस्तांतरण करण्यात आले. या वेळी मुंबई विद्यापीठाचे कुलगुरू प्रा. रवींद्र कुलकर्णी, उच्चशिक्षण विभागाचे सचिव प्रा. विनीत जोशी, संचालक डॉ. डी. के. शर्मा, कौशल्य प्रशिक्षण मंडळ पश्चिम विभाग बोर्ड ऑफ गव्हर्निंगचे अध्यक्ष गोविंद जयस्वाल आणि पी. एन. जुमले यांच्यासह शिक्षण क्षेत्रातील मान्यवर उपस्थित होते.