खासगी वैद्यकीय महाविद्यालयांतील ईडब्ल्यूएस आरक्षण रद्द

मुंबई, ता. ३० ः राज्यातील खासगी वैद्यकीय महाविद्यालयांतील आर्थिकदृष्ट्या दुर्बल घटकांसाठी (ईडब्ल्यूएस) १० टक्के देण्यात येणारे प्रवेशाचे आरक्षण रद्द करण्यात आले आहे. केंद्र सरकारकडून जोपर्यंत या आरक्षणाच्या क्षमतेच्या अधिकच्या जागा वाढवून दिल्या जाणार नाहीत, तोपर्यंत त्या आरक्षणाची अंमलबजावणी करता येणार नसल्‍याचे सांगत राज्य सरकारने ईडब्ल्यूएसच्या आरक्षणासंदर्भातील आपला निर्णय बदलला आहे.
पदवी आणि पदव्युत्तर आदींच्या वैद्यकीय प्रवेश घेऊ इच्छिणाऱ्या विद्यार्थ्यांच्या पालकांच्या एका गटाने आणि शिक्षण कार्यकर्त्यांनी खासगी वैद्यकीय शिक्षण संस्थांमध्ये आरक्षणाच्या अंमलबजावणीला विरोध करण्यासाठी मंगळवारी (ता. २९) राज्य वैद्यकीय शिक्षणमंत्री हसन मुश्रीफ यांची भेट घेतली. या बैठकीनंतर बुधवारी (ता. ३०) राज्य वैद्यकीय शिक्षण विभागाने आरक्षणाबद्दल नवीन स्पष्टीकरण दिले. त्यासाठी आदेश जारी करत हे आरक्षण केंद्र सरकारच्या संबंधित परिषदेने विद्यमान जागा वाढवल्या तरच लागू होईल, असे आज स्पष्ट केले. यातील स्पष्टीकरणानुसार, राज्य सरकार खासगी वैद्यकीय महाविद्यालयांमध्ये ईडब्ल्यूएस आरक्षणाची अंमलबजावणी करणार नाही, जोपर्यंत जागांची क्षमता वाढवली जात नाही. ही भूमिका केंद्र सरकारच्या २०१९च्या मूळ दृष्टिकोनाशी सुसंगत असल्याचे सांगण्यात आले.