विद्यार्थ्याला मेणबत्तीचे चटके, शिक्षिकेविरोधात गुन्हा
मुंबई, ता. ३० : हस्ताक्षर खराब असल्याने तिसऱ्या इयत्तेत शिकणाऱ्या विद्यार्थ्याच्या उजव्या तळहातावर खासगी शिकवणीच्या शिक्षिकेने पेटत्या मेणबत्तीचे चटके दिले. हा प्रकार सोमवारी (ता. २८) रात्री मालाड येथे घडला. पालकांनी दिलेल्या तक्रारीच्या आधारे कुरार पोलिसांनी शिक्षिका राजश्री राठोड यांच्याविरोधात मंगळवारी (ता. २९) गुन्हा नोंदवला. मुलाच्या पालकांनी जाब विचारला असता राठोड यांनी शिक्षा म्हणून मेणबत्तीचे चटके दिल्याचे कबूल केले; मात्र इतकी कठोर शिक्षा का? या पालकांच्या प्रश्नावर त्यांनी वाद घातला, असे पोलिसांनी सांगितले.