कर्नाळा बँकेच्या ठेवीदारांना दिलासा
जप्त मालमत्तेच्या लिलावास न्यायालयाची परवानगी

मुंबई, ता.३० : कर्नाळा नागरी सहकारी बँक घोटाळ्यात सक्तवसुली संचालनालयाने (ईडी) जप्त केलेल्या ३६० कोटींच्या मालमत्तेचा लिलाव करून आलेली रक्कम खातेधारकांमध्ये वाटण्यास परवानगी दिली आहे. विशेष पीएमएलए न्यायालयाने २२ जुलै रोजी तसा आदेश दिल्याचे ईडीकडून बुधवारी (ता.३०) जाहीर करण्यात आले.

पाच लाखांहून अधिक खातेधारक, गुंतवणूकदारांची सुमारे ५६० कोटींच्या ठेवी कर्नाळा नागरी सहकारी बँकेत होत्या; मात्र तत्कालीन अध्यक्ष आणि शेकापचे माजी आमदार विवेक पाटील, बँकेचे संचालक मंडळ आणि अन्य अधिकाऱ्यांनी संगनमत करून ६३ बोगस कर्ज खात्यांद्वारे या ठेवी लाटल्याचा आरोप करण्यात आला आहे. या प्रकरणी २०२०मध्ये पाटील यांच्यासह एकूण ७५ जणांविरोधात पनवेल पोलिस ठाण्यात गुन्हा नोंद केला गेला. या प्रकरणाचा समांतर तपास करणाऱ्या ईडीने पाटील आणि अन्य आरोपींना अटक करत तब्बल ३६० कोटींची मालमत्ता जप्त केली होती.