आंतरराष्ट्रीय विमानतळावर नेटवर्क ठप्प
मुंबई, ता. ९ : मुंबईच्या छत्रपती शिवाजी महाराज आंतरराष्ट्रीय विमानतळावर शनिवारी सायंकाळी ४ वाजण्याच्या सुमारास नेटवर्क ठप्प झाले. त्यामुळे प्रवाशांची मोठी गैरसोय झाली. परिणामी विमानतळावर प्रवाशांची मोठ्या प्रमाणात गर्दी पाहायला मिळाली.

विमानतळावरील सर्व्हरच डाऊन झाल्याने प्रवाशांना मोठा मनस्ताप सहन करावा लागला. विशेष म्हणजे विमानांचे उड्डाणही उशिराने झाले. या तांत्रिक अडचणीमुळे इंडिगो, एयर इंडिया, अकासा, विस्तारा या विमान कंपन्यांना मोठा आर्थिक फटका बसला. या बिघाडामुळे विमानतळावर प्रवाशांची गर्दी वाढली. सर्व्हर डाऊन झाल्यामुळे चेक-इन व बोर्डिंगची संपूर्ण प्रक्रिया ‘मॅन्युअल मोड’वर वळवण्यात आली. त्यामुळे प्रवाशांच्या सामानाची तपासणी करण्यासाठी वेळ लागला. एक तासभर नेटवर्क बिघाड दुरुस्त झाल्यानंतर काही वेळाने गर्दी कमी झाली.