निर्माल्यापासून घडणार पर्यावरणपूरक गणेशमूर्ती
गणेश मंडळांना सहकार्याचे पालिकेचे आवाहन
सकाळ वृत्तसेवा
मुंबई, ता. ११ : गणेशोत्सवाच्या काळात मोठ्या प्रमाणावर होणारा हार-फुलांचा वापर आणि त्यातून निर्माण होणारे निर्माल्य पर्यावरणपूरक पद्धतीने वापरण्याचा अनोखा उपक्रम यंदा राबवला जाणार आहे. कोपरखैरणे येथील इच्छापूर्ती मंडळाने ‘बाप्पा फुलांचा, उत्सव एकात्मतेचा’ या नावाने हा ऐतिहासिक प्रकल्प हाती घेतला असून, निर्माल्याचा पुनर्वापर करून पर्यावरणपूरक गणेशमूर्ती साकारली जाणार आहे. यासाठी त्यांनी मुंबईतील गणेशमंडळांना सहकार्य करण्याचे आवाहन केले आहे.
गणेशोत्सवात मंडळे आणि भाविकांकडून श्री गणेशाला अर्पण होणारे हार, फुले तसेच सजावटीसाठी वापरले जाणारे पुष्पगुच्छ हे मौल्यवान संसाधन म्हणून गोळा केले जाणार आहे. नंतर याच फुलांपासून आणि कागदापासून पर्यावरणपूरक गणेशमूर्ती तयार करण्यात येईल. हा उपक्रम केवळ पर्यावरण संवर्धनासाठीच नव्हे तर सर्व गणेश मंडळांना एकत्र आणून एकतेचा संदेश देण्यासाठीही राबवला जाणार आहे.
या प्रकल्पासाठी बृहन्मुंबई सार्वजनिक गणेशोत्सव समन्वय समितीकडून सर्व गणेश मंडळांना सहकार्याचे आवाहन करण्यात आले आहे. उपक्रमात सहभागी होऊ इच्छिणाऱ्या मंडळांनी आपले नाव, पत्ता व संपर्क क्रमांक दिल्यास इच्छापूर्ती मंडळाचे प्रतिनिधी स्वतः मंडळांशी संपर्क साधून निर्माल्य संकलन करतील.
मोरया सांस्कृतिक कला व क्रीडा मंडळाचे अध्यक्ष ऋषिकेश पालवे यांनी सांगितले, की गेल्या पाच वर्षांपासून आम्ही फुलं व कागदाचा वापर करून पर्यावरणपूरक गणेशोत्सव साजरा करीत आहोत. पुढील वर्षी रौप्यमहोत्सवाच्या निमित्ताने हा उपक्रम एक ऐतिहासिक पाऊल ठरेल. फुलांमधून भक्ती साकारून एकतेच्या रंगांनी बाप्पा सजवण्याचा आमचा संकल्प आहे, असे त्‍यांनी सांगितले.

ही मूर्ती कशी बनते?
१. मंदिरात भक्तांनी अर्पण केलेली फुले साठवून ती नैसर्गिक पद्धतीने वाळवली जातात. या सुकवलेल्या फुलांच्या पाकळ्या केल्या जातात.
२. मग त्या फुलांच्या पाकळ्या भाजल्या जातात. यामुळे त्यातील उरलेला ओलावा पूर्णपणे निघून जातो. यानंतर त्या पाकळ्यांचे बारीक, सुटसुटीत चूर्ण तयार केले जाते.
३. तयार केलेले चूर्ण डिंक आणि माती यांच्यासोबत नीट मिसळून मिश्रण तयार केले जाते. या मिश्रणातून घट्ट आणि एकसंध असा लगदा तयार होतो.
४. हा लगदा मग मूर्तीच्या साच्यांमध्ये काळजीपूर्वक ओतला जातो आणि त्यातून मूर्ती घडवली जाते. या संपूर्ण प्रक्रियेत बारकाईने मेहनत घेतली जाते.