कोकणात गणपती स्पेशल ‘मोदी एक्स्प्रेस’ धावणार!
मंत्री नितेश राणे यांच्या पुढाकारातून मोफत रेल्वेसेवा
सकाळ वृत्तसेवा
मुंबई, ता. १४ : गणेशोत्सवाच्या पार्श्वभूमीवर कोकणातील चाकरमान्यांसाठी दिलासादायक ठरणारी परंपरा याही वर्षी कायम राहणार आहे. मंत्री नितेश राणे यांच्या पुढाकारातून दरवर्षीप्रमाणे ‘मोदी एक्स्प्रेस’ गणपती स्पेशल रेल्वेसेवा यंदाही सज्ज होणार आहे. केवळ एक नव्हे, तर तब्बल दोन मोफत विशेष गाड्या कोकणवासीयांसाठी धावणार असल्याची घोषणा राणे यांनी केली.
ही सेवा अविरतपणे गेली १२ वर्षे सुरू असून, यंदा या उपक्रमाचे १३ वे वर्ष आहे. राणे म्हणाले, लोकसभा आणि विधानसभा निवडणुकीत कोकणातील जनतेने आम्हाला आणि भारतीय जनता पक्षाला भरभरून पाठिंबा दिला. कणकवली, देवगड व वैभववाडी मतदारसंघातील जनतेने सलग तिसऱ्यांदा आमच्यावर विश्वास ठेवला. त्याच्या कृतज्ञतेपोटी यंदा आम्ही दोन विशेष गाड्या सोडत आहोत. या गाड्यांमधील सर्व प्रवाशांना मोफत जेवण आणि पिण्याच्या पाण्याची सोय केली जाणार आहे.

प्रवासाचे वेळापत्रक -
- शनिवार, २३ ऑगस्ट २०२५ दादर स्थानक फलाट क्र. १४ वरून सकाळी ११ वाजता सुटणार; रत्नागिरी, कुडाळ येथे थांबून सावंतवाडी येथे पोहोचणार.
- रविवार, २४ ऑगस्ट २०२५ दादर स्थानक फलाट क्र. १४ वरून सकाळी ११ वाजता सुटणार; वैभववाडी व कणकवली येथे थांबणार.

तिकीटवाटपाची तारीख
तिकीटवाटप सोमवार, १८ ऑगस्टपासून सुरू होणार असून, प्रवाशांनी आपापल्या मंडळाध्यक्षांकडे नाव नोंदणी करावी, असे आवाहन करण्यात आले आहे. राणे यांनी कोकणवासीयांना या ‘गणपती स्पेशल मोदी एक्स्प्रेस’च्या लाभ घ्यावा, असे आवाहन केले आहे.