मुंबईतील वृद्ध महिला
महिनाभर आभासी अटकेत
सात कोटींचा गंडा; खऱ्या पोलिसांनाही हुसकावले
सकाळ वृत्तसेवा
मुंबई, ता. १४ ः दक्षिण मुंबईतील रहिवासी आणि एका तेल कंपनीतून निवृत्त झालेल्या ८१ वर्षांच्या वृद्धेला तब्बल महिनाभर आभासी अटकेत ठेवत सायबर चोरट्यांनी सुमारे सात कोटी रुपयांना गंडा घातल्याचा प्रकार नुकताच उघडकीस आला. विशेष म्हणजे चोरट्यांनी या वृद्धेवर इतका प्रभाव टाकला की घरी धडकलेल्या खऱ्याखुऱ्या पोलिसांनाही या वृद्धेने हाकलले. याप्रकरणी सायबर पोलिसांनी अनोळखी आरोपींविरोधात गुन्हा दाखल केला आहे.
१० जुलै रोजी पीडित वृद्धेला कुलाबा पोलिस ठाण्यातून बोलत असल्याचे भासवत व्हिडिओ कॉलद्वारे संपर्क साधला. समोरील व्यक्ती पोलिस गणवेशात असल्याने वृद्धेने त्यांच्यावर विश्वास ठेवून संवाद पुढे नेला. एका मोठ्या आर्थिक गैरव्यवहार प्रकरणात आपल्या बँक खात्याचा वापर झाल्याचे तपासात स्पष्ट झाले आहे. त्यामुळे आम्ही तुम्हाला अटक करत आहोत, असे समोरील व्यक्तीने वृद्धेला सांगितले. घरी एकटेच वास्तव्यास असलेल्या वृद्धेला चोरट्यांनी पूर्णपणे आपल्या जाळ्यात ओढून तपासाच्या नावाखाली सर्व जमापुंजी, गुंतवणूक आदी मोडून ती रक्कम विविध खात्यांवर वळती करून घेतली.
वृद्धेने अचानक सुरू केलेल्या या व्यवहारांबाबत बँक अधिकाऱ्यांना संशय आला. त्यांनी पोलिसांना याबाबत कळवले असता, आझाद मैदान पोलिस वृद्धेच्या घरी धडकले; मात्र त्यांना घरात घेण्यास वृद्धेने नकार दिला. मला कोणाचा फोन आलेला नाही, मी कोणाच्याही खात्यावर पैसे वळते केलेले नाहीत, या भूमिकेवर वृद्धा ठाम होती. प्रत्यक्षात त्याच दिवशी तिने ५९ लाख रुपये चोरट्यांच्या खात्यांवर पाठवले होते. अखेर मुलीच्या मदतीने वृद्धेची समजूत काढल्यावर भानावर आलेल्या वृद्धेने आतापर्यंत सात कोटी रुपये चोरट्यांना दिल्याचे कबूल केले.
----
बँक खाती गोठवून थांबवला प्रकार
अखेर घरमालकाच्या मध्यस्थीने पोलिस त्यांच्या घरी आले. आभासी अटकेच्या माध्यमातून झालेल्या फसवणुकीच्या वृत्तपत्रांतील प्रसिद्ध बातम्या दाखवून पोलिसांनी वृद्धेची समजूत काढण्याचा प्रयत्न केला; मात्र ती आपल्या भूमिकेवर ठाम होती. आपली अन्य मालमत्ता विकून त्या चोरट्यांना पैसे देतील, या भीतीने पोलिसांनी स्वतःच बँकेच्या हेल्पलाइनला संपर्क साधून त्यांची बँक खाती गोठवली.