मुंबईतील ६० वर्षांहून जुन्या इमारतींचा पुनर्विकास
आदित्य ठाकरे यांचा ठाम पाठिंबा
सकाळ वृत्तसेवा
मुंबई, ता. १५ : शिवसेना (उद्धव बाळासाहेब ठाकरे) पक्षाचे नेते आदित्य ठाकरे यांनी मुंबईतील ६० वर्षांहून जुन्या, जीर्ण व धोकादायक निवासी इमारतींच्या पुनर्विकासासाठी संपूर्ण पाठिंबा देण्याचे आश्वासन दिले आहे. मातोश्री येथे पगडी एकता संघाच्या ५० सदस्यीय प्रतिनिधी मंडळाशी झालेल्या बैठकीनंतर त्यांनी ही भूमिका स्पष्ट केली. बैठकीस माजी मंत्री अनिल परब उपस्थित होते.
शहरभर पसरलेल्या सेस इमारतींतील भाडेकरूंचे प्रतिनिधित्व करणाऱ्या या संघाने दशकांपूर्वी बांधलेल्या व धोकादायक इमारतींमध्ये राहणाऱ्या १८ लाख कुटुंबांच्या भवितव्याबाबत चिंता व्यक्त केली. अलीकडील मुंबई उच्च न्यायालयाच्या निर्णयानंतर पुनर्विकासाची कामे ठप्प झाली आहेत. या निर्णयानुसार म्हाडा, म्हाडा कायदा कलम ७९अ अंतर्गत काही प्रकरणांमध्ये ‘सक्षम प्राधिकरण’ म्हणून काम करू शकत नाही. पूर्वी या कलमातील दुरुस्तीमुळे हजारो सी-१ वर्गातील (अत्यंत धोकादायक) इमारतींच्या रहिवाशांना आशा निर्माण झाली होती; मात्र आता सर्वोच्च न्यायालयात प्रकरण प्रलंबित आहे.
प्रतिनिधी मंडळाने १९४० पूर्वी बांधलेल्या सर्व ए-श्रेणी इमारतींचा तातडीने पुनर्विकास करण्याची मागणी केली. तसेच इमारत धोकादायक घोषित झाल्यानंतर लगेच भाडेकरूंना बाहेर न काढता पुनर्विकास सुरू होईपर्यंत राहण्याची परवानगी देण्याची मागणीही त्यांनी केली.

गणेशोत्सवानंतर भव्य मोर्चा
पगडी एकता संघाचे अध्यक्ष मुकेश शाह यांनी सांगितले, की आदित्य ठाकरे यांनी सर्व आमदार-खासदारांना या विषयात सहभागी करून ही बाब विधानसभा व संसदेत मांडण्याचे आश्वासन दिले आहे. संघाच्या सचिव वनीता राणे यांनी गणेशोत्सवानंतर होणाऱ्या भव्य मोर्चासाठी आदित्य ठाकरे यांना आमंत्रित केले. तर कार्यकर्ते जितेंद्र घाटगे यांनी रहिवाशांना या मोहिमेत सहभागी होण्याचे आवाहन केले.
......